Memleket basshysy Qasym-Jomart Toqaev Joǵary aýditorlyq palatanyń tóraǵasy Álihan Smaiylovty qabyldady. Kezdesýde Qorǵanys ministrligindegi biýdjet qarajatynyń tiimdi jumsalýyna qatysty jospardan tys júrgizilip jatqan aýdittiń barysy talqylandy, dep habarlaidy ult.kz.
50 nysan tekseriledi
Álihan Smaiylovtyń aitýynsha, aýqymdy aýdit 50 nysandy, onyń ishinde 48 áskeri bólimdi qamtidy.
Tekserý úshin memlekettik aýdit júiesiniń jetekshi mamandarynan, sondai-aq IT jáne bailanys salasynyń sarapshylarynan arnaiy top qurylǵan.
Aýdit barysynda Qarýly kúshter qyzmetiniń negizgi baǵyttary boiynsha jaǵdaiǵa baǵa beriledi.
Atap aitqanda:
- áskeri bólimderdiń materialdyq-tehnikalyq qamtamasyz etilýi;
- áskeri qyzmetshilerdiń daiarlyǵy;
- oqý-jattyǵýlardyń ótkizilýi;
- áskeri infraqurylymnyń damýy;
- qarý-jaraq pen áskeri tehnikanyń jańǵyrtylýy;
- tsifrlyq júielerdiń jumys isteýi tekseriledi.
Qorǵanys salasyndaǵy memlekettik tapsyrys ta tekserilgen
Prezidentke qorǵanys salasyndaǵy memlekettik tapsyrysqa júrgizilgen aýdittiń nátijeleri de tanystyryldy.
Tekserý qorytyndysy boiynsha anyqtalǵan zań buzýshylyqtardy joiý úshin Úkimet pen salalyq memlekettik organdarǵa 57 naqty usynym men tapsyrma joldanǵan.
Sonymen qatar Álihan Smaiylov ekonomikalyq damý men áleýmettik salanyń basym baǵyttaryn qamtityn josparly aýditorlyq tekseristerdiń barysy týraly baiandady.
Kezdesýde Astanada ótken Aziia joǵary aýdit organdary uiymy Basqarma keńesiniń 63-otyrysynyń qorytyndysy da aityldy. Oǵan 19 eldiń ókilderi qatysty. Mundai formattaǵy jiyn Qazaqstanda alǵash ret ótkizilgen.
Kezdesý sońynda Qasym-Jomart Toqaev Qorǵanys ministrligindegi aýditti júrgizýge jáne memlekettik aýdit júiesin odan ári jetildirýge qatysty birqatar naqty tapsyrma berdi.
