Áýezov aýdanynda qazan aiynyń sońyna deiin 11 kóp qabatty turǵyn úidiń qasbetin jóndep, 10 aýlaǵa kúrdeli jóndeý júrgizip, jańa Qadam saiabaǵyn ashý josparlanyp otyr. Sonymen qatar aýdanda turǵyn úi qoryn jańartý jumysy da jalǵasyn taýyp, Jubanov kóshesinde qoǵamdyq keńistikti abattandyrý jumysy aiaqtaldy. Óńirlik kommýnikatsiialar qyzmetinde aýdan ákimi Abzal Egemberdiev osy jumystyń aiaq alysy týraly aityp berdi, dep habarlaidy ult.kz.
Aýdanda 1 917 kóp qabatty turǵyn úi bar. Onyń 797-si 1960–1970 jyly salynǵan. Aýdan basshysynyń aitýynsha, qazir Abai dańǵylynyń boiyndaǵy 11 úidiń qasbeti qosa jóndelip jatyr eken.
«2023–2029 jylǵa arnalǵan turǵyn úi-kommýnaldyq infraqurylymdy damytý tujyrymdamasy aiasynda 2026 jylǵa 40 kópqabatty turǵyn úidiń shatyry men injenerlik jelisine kúrdeli jóndeý júrgizý máselesi pysyqtaldy. Taǵy 19 úide lifti aýystyrý jaǵyn da qosa qarastyrdyq. Bul jumys negizgi konstrýktsiialary men kommýnikatsiialaryn jańartýdy qajet etetin úilerdi qamtidy», – dep baiandady aýdan ákimi Abzal Egemberdiev.
№5 shaǵyn aýdan men Aqsai-4 yqsham aýdanyndaǵy 10 aýla aýmaǵyna kúrdeli jóndeý jumysy qyrkúiek aiynda bastaldy. Jumysty qazan aiynyń sońyna deiin aiaqtaýdy oilastyryp otyr.
«Biyl 135 aýla ishinara jóndeldi. Fýtbol men basketbol alańynyń qorshaýy men jabyndary, balalar men sport alańynyń jabyny jóndelip, shaǵyn sáýlet nysandary ornatyldy. Bul aýdannyń ár bóligindegi aýlalardy kezeń-kezeńimen retke keltirýge múmkindik beredi», – deidi aýdan ákimi.
Aiaqtalǵan jobanyń biri – quny 2,603 mlrd teńgeni quraǵan Jubanov kóshesin abattandyrý jumysy. Munda balalar men sport alańy jańartylyp, kóshe jihazdary ornatyldy, jaryqtandyrý tirekteri aýystyrylyp, jańalary qoiyldy. Sondai-aq jasyl jelekter egili, avtomatty sýarý júiesi qoiyldy.
Biyl «Halyq qatysatyn biýdjet» baǵdarlamasy boiynsha taǵy 29 joba júzege asyryldy. Onyń altaýy qoǵamdyq keńistikterdi abattandyrýǵa, taǵy 23-i aýla aýmaqtaryn jańartýǵa baǵyttalǵan.
«Qadam saiabaǵy Saiyn men Ulyqbek kóshesiniń qiylysynda, aýmaǵy 0,35 gektar bolatyn burynǵy avtoturaqtyń ornynda salynyp jatyr. Munda túrli tabiǵi jabyndardan turatyn taktildi alleia, balalar alańy, júgirý joly, syrǵanaý men parkýr aimaqtary, serýendeýge arnalǵan keńistik pen kógaldandyrý jaǵy qarastyrylǵan. Ortalyq element retinde sýburqaǵy, jaryqtandyrylýy jáne “Bolashaqqa qadam” degen jazýy bar arkaly kompozitsiia ornatylady», – dep tolyqtyrdy sózin Abzal Egemberdiev.
