Tanymal akter Qairat Ádilgerei ánshilerdiń sahnalyq obrazyna qatysty pikir bildirip, qara kózildirikpen óner kórsetýdi synǵa aldy, dep habarlaidy ult.kz.
Óner iesi «Habar» arnasyndaǵy «Juldyzdy jekpe-jek» baǵdarlamasynda Qobylandy Bolattyń obrazyna toqtalǵan.
"Toi bolsyn, sahna bolsyn bári kózildirik kiip júredi. Negizi etiket boiynsha ol kúnnen qorǵaityn zat. Halyq emotsiiany kóz arqyly sezip, biledi", - dedi akter.
Qairat Ádilgereidiń bul pikiri áleýmettik jelide de qyzý talqylandy. Birqatar jeli qoldanýshysy akterdiń sózin qoldap, qara kózildiriktiń ánshiniń emotsiiasyn jasyratynyn jazdy. Olar buryn ónerpazdardyń sahnaǵa shyǵarda kózildirigin sheshýi qalypty mádeniet sanalǵanyn alǵa tartqan.
Degenmen talqylaýǵa qatysqandardyń arasynda mundai syn barlyq ónerpazǵa birdei aitylýy kerek dep esepteitinder de boldy. Keibiri sahnada qara kózildirik taǵatyn basqa tanymal ánshilerdi mysalǵa keltirgen.
Osylaisha, Qairat Ádilgereidiń pikiri jelide sahnalyq obraz ben ónerdegi etiketke qatysty jańa pikirtalasqa sebep boldy.
Qobylandy Bolat kim?
Qobylandy Bolat - qazaqstandyq akter, ánshi ári avtor. Ol 1994 jyly Pavlodar oblysynyń Baianaýyl óńirinde dúniege kelgen. Balalyq shaǵy Baianaýylda ótip, ónerge erte jastan qyzyǵýshylyq tanytqan. Qobylandy Bolat suhbattarynyń birinde bala kezinen ánshi ári akter bolýdy armandaǵanyn aitqan. 2009 jyly P. Chaikovskii atyndaǵy daryndy balalarǵa arnalǵan mýzykalyq kolledjge túsip, "Mýzykalyq bilim berý" mamandyǵy boiynsha tórt jyl bilim alǵan. Keiin 2013–2017 jyldary Astanadaǵy Qazaq ulttyq óner ýniversitetinde oqyp, "Teatr jáne kino" fakýltetin támamdady.
Óner jolyn teatr men kino salasynda qatar jalǵastyrǵan Qobylandy Bolat qalyń kórermenge ásirese "5:32" serialy arqyly keńinen tanyldy. Ol bul jobadaǵy rólinen keiin akter retinde úlken aýditoriianyń nazaryn aýdardy. Serialda birge jumys istegen Mansurmen "Jaryq" ánin shyǵarǵan, onyń mýzykasyn Qobylandy Bolattyń ózi jazǵan.
Keiin ónerpaz ánshilik baǵytqa da belsendi bet buryp, KOBA sahnalyq atymen shyǵarmashylyǵyn damyta bastady. Onyń resmi paraqshasynda "5:32", "Missiia vypolnima", "Niania. Biznes po-kyzdarski", "Zavod", "Tak polýchilos", "Koba", "Kapitan Baitasov" sekildi birqatar kino jáne serial jobalary kórsetilgen.
Qobylandy Bolat dýbliaj salasynda da ózin synap kórdi. Ol Disney stýdiiasynyń "Moana 2" animatsiialyq filminiń qazaq tilindegi nusqasynda jartylai qudai Maýi keiipkerin dybystaǵan. Osy arqyly onyń akterlik qyrymen qatar vokaldyq jáne dybystaý sheberligi de kórindi.
Búginde Qobylandy Bolat kino, teatr jáne mýzyka salalaryn qatar alyp júrgen jas ónerpazdardyń biri. Onyń shyǵarmashylyǵynda akterlik pen ánshilik ózara ushtasyp, KOBA beinesi arqyly tyńdarmanǵa zamanaýi mýzykalyq baǵyt usynyp keledi.
