Izmir qalasynda qirandylardyń astynda jatqan 3 jasar Elif Perinchek arada 65 saǵat ótkende qutqaryldy. Ol – Túrkiianyń batysynda bolǵan zilzaladan soń qutqarýshylar aman alyp shyqqan 106-shy turǵyn, dep habarlaidy Anadoly agenttigi.
Kishkentai qyz jaqyn mańdaǵy aýrýhanalardyń birine jetkizildi.
Túrkiia úkimeti janyndaǵy tótenshe jaǵdailardyń aldyn alý jáne saldaryn joiý basqarmasynyń (AFAD) basshysy Mehmet Giýlliýoglý balanyń qutqarylǵanyna qýanyshyn bildirdi.
Eliftiń týystary buny tańǵajaiyp oqiǵaǵa teńep otyr.
Bunyń aldynda búgin qutqarýshylar úiindiniń astynan 14 jasar Idil Shirindi alyp shyqqan bolatyn.
2 qarashadaǵy jaǵdai boiynsha, Túrkiianyń Izmir qalasynda 6.9 magnitýdaly jer silkinisiniń saldarynan 79 adam qaza tapqan. Zardap shekken 963 adamnyń ishinde 743 adam aýrýhanadan shyǵaryldy, 219 adam em qabyldap jatyr.
Segiz turǵyn úidiń úiindilerinde izdeý-qutqarý jumysy jalǵasyp jatyr.
Túrkiia jaǵalaýyndaǵy birinshi jer silkinisinen keiin Egei teńizinde jalpy alǵanda 1120 álsiz sezilgen jerasty dúmpýi tirkelgen, bul rette 43-iniń magnitýdasy 4 baldan asty.
Túrkiia prezidenti Rejep Taiyp Erdoǵan zilzala saldaryn joiý úshin memlekettiń búkil qajetti qory shoǵyrlandyrylatynyn málimdedi. Sondai-aq ol baspanasynan aiyrylǵan barlyq turǵynnyń jańa páter alatynyn atap ótti.
