Túrkiia prezidenti Rejep Erdoǵan ózi týraly karikatýra jariialaǵan frantsýzdyń Charlie Hebdo jýrnalyn sotqa berdi. "Anadolý" agenttiginiń habarlaýynsha, Túrkiia prokýratýrasy Erdoǵan advokatynyń shaǵymy boiynsha qylmystyq is qozǵai alady.
Advokattyń baǵalaýynsha, jýrnaldaǵy sýret - "sóz bostandyǵyna esh qatysy joq" qylmys sipatynda jazalanýy tiis ǵaibat nárse. Prokýrorlar prezidenttiń "ar-namysyna tiiý" baby boiynsha da tergeýdi de bastap ketken.
Charlie Hebdo Erdoǵandy ájýalaǵan karikatýrasyn 28 qazanda jariialaǵan. Onda jartylai jalańash kúidegi Erdoǵan men hidjab kigen áiel beinelengen. Karikatýraǵa "Erdoǵan jeke ómirde óte oinaqy" degen sipattama jazylǵan.
Mektep muǵalimi Samiýel Patidiń óliminen keiin Parij ben Ankara arasynda jaǵdai ýshyqqan kezde karikatýra jariialanyp otyr. Oqýshylarǵa sabaq kezinde sóz bostandyǵy týraly aityp, Muhammed paiǵambardyń karikatýrasyn kórsetken muǵalim 16 qazanda óltirilgen.
Frantsiia prezidenti Emmanýel Makron shabýyldyń "islamisterden" kelgenin aityp, din daǵdarysqa túsken kezde zaiyrly qoǵam qundylyqtaryn qorǵaýǵa shaqyrǵan. Osydan soń Erdoǵan Makrondy islamofob dep aiyptap, "psihikasyn teksertý úshin dárigerge barýǵa keńes bergen". Parij Ankaradaǵy elshisin qaitaryp aldy.
Túrkiia biligi Erdoǵan karikatýrasyn "mádeni násilshildik pen dushpandyqty taratý talpynysy" dep atady.
