Qazaqstan Respýblikasynyń Prezidenti Qasym-Jomart Toqaev Qazaqstan Respýblikasynyń Ulttyq arhivi men Qazaqstan Respýblikasynyń Ortalyq memlekettik arhivine «Ulttyq» mártebe berý týraly Jarlyqqa qol qoidy. Qujat 2027 jylǵy 1 qańtardan bastap kúshine enedi, dep habarlaidy ult.kz.
Jańa mártebe arhivterdiń elimizdiń tarihi-mádeni murasyn saqtaýdaǵy airyqsha mańyzyn kórsetedi. Sondai-aq arhiv qujattarynyń saqtalýy men qoljetimdiligin qamtamasyz etý, qorlardy tsifrlandyrý jáne qundy tarihi derekterdi ǵylymi ainalymǵa engizý isindegi rólin aiqyndaidy.
Qazaqstan Respýblikasynyń Ortalyq memlekettik arhivi 1921 jyly qurylǵan. Arhiv qorynda elimizdiń ár kezeńdegi tarihynan, qazaq memlekettiliginiń qalyptasýynan, ulttyq mádeniet pen ǵylymnyń damýynan syr shertetin biregei qujattar saqtalǵan. Budan bólek, kórnekti tulǵalardyń ómiri men qyzmetine qatysty qundy derekter jinaqtalǵan. Búginde arhivtiń 2 309 qorynda 1,3 millionnan astam saqtaý birligi bar.
Qazaqstan Respýblikasynyń Ulttyq arhivi 2006 jyly qurylǵan. Mekeme elimizdiń saiasi, áleýmettik-ekonomikalyq jáne mádeni damý tarihyna qatysty qujattardy jinaqtaý, saqtaý jáne paidalanýmen ainalysady. Munda memlekettik organdardyń, zertteýshilerdiń jáne azamattardyń arhiv qujattarymen tanysýǵa bolady. Qazir Ulttyq arhivtiń 311 qorynda 405 589 saqtaý birligi saqtalǵan. Mekeme 278 memlekettik organmen jáne uiymmen bailanys ornatyp, olardyń arhiv qujattaryn qabyldaý jáne saqtaý jumysyn júrgizedi.
