تٷركييا پرەزيدەنتٸ رەجەپ ەردوعان ٶزٸ تۋرالى كاريكاتۋرا جارييالاعان فرانتسۋزدىڭ Charlie Hebdo جۋرنالىن سوتقا بەردٸ. "انادولۋ" اگەنتتٸگٸنٸڭ حابارلاۋىنشا, تٷركييا پروكۋراتۋراسى ەردوعان ادۆوكاتىنىڭ شاعىمى بويىنشا قىلمىستىق ٸس قوزعاي الادى.
ادۆوكاتتىڭ باعالاۋىنشا, جۋرنالداعى سۋرەت - "سٶز بوستاندىعىنا ەش قاتىسى جوق" قىلمىس سيپاتىندا جازالانۋى تيٸس عايبات نەرسە. پروكۋرورلار پرەزيدەنتتٸڭ "ار-نامىسىنا تييۋ" بابى بويىنشا دا تەرگەۋدٸ دە باستاپ كەتكەن.
Charlie Hebdo ەردوعاندى ەجۋالاعان كاريكاتۋراسىن 28 قازاندا جارييالاعان. وندا جارتىلاي جالاڭاش كٷيدەگٸ ەردوعان مەن حيدجاب كيگەن ەيەل بەينەلەنگەن. كاريكاتۋراعا "ەردوعان جەكە ٶمٸردە ٶتە ويناقى" دەگەن سيپاتتاما جازىلعان.
مەكتەپ مۇعالٸمٸ ساميۋەل پاتيدٸڭ ٶلٸمٸنەن كەيٸن پاريج بەن انكارا اراسىندا جاعداي ۋشىققان كەزدە كاريكاتۋرا جارييالانىپ وتىر. وقۋشىلارعا ساباق كەزٸندە سٶز بوستاندىعى تۋرالى ايتىپ, مۇحاممەد پايعامباردىڭ كاريكاتۋراسىن كٶرسەتكەن مۇعالٸم 16 قازاندا ٶلتٸرٸلگەن.
فرانتسييا پرەزيدەنتٸ ەممانۋەل ماكرون شابۋىلدىڭ "يسلاميستەردەن" كەلگەنٸن ايتىپ, دٸن داعدارىسقا تٷسكەن كەزدە زايىرلى قوعام قۇندىلىقتارىن قورعاۋعا شاقىرعان. وسىدان سوڭ ەردوعان ماكروندى يسلاموفوب دەپ ايىپتاپ, "پسيحيكاسىن تەكسەرتۋ ٷشٸن دەرٸگەرگە بارۋعا كەڭەس بەرگەن". پاريج انكاراداعى ەلشٸسٸن قايتارىپ الدى.
تٷركييا بيلٸگٸ ەردوعان كاريكاتۋراسىن "مەدەني نەسٸلشٸلدٸك پەن دۇشپاندىقتى تاراتۋ تالپىنىسى" دەپ اتادى.
