Túrkistanǵa kelgen týrister 100 jyldan astam tarihy bar jádigerlerdi tamashalaýda, dep habarlaidy QazAqparat.
Ulystyń Uly kúni – Naýryz merekesine orai Túrkistanǵa kelgen týristerge qazaq halqynyń qundy etnografiialyq muralaryn nasihattaý maqsatynda «Babadan qalǵan bar mura» kóshpeli kórmesi ashyldy.
Kórmege 100 jyldan astam tarihy bar Túrkistan oblystyq tarihi-ólketaný mýzeii qorynan jasaqtalǵan 80-nen asa jádiger qoiyldy.
Qazaq etnografiiasynan syr shertetin kórmeni «Áziret Sultan» memlekettik tarihi-mádeni mýzei-qoryǵy» direktorynyń orynbasary Ersin Tájibaev quttyqtaý sózben ashyp, tarihi jádigerler tanystyrylymyna sáttilik tiledi.
Kórme úsh bólimnen turdy. Qazaqtyń zergerlik buiymdary bóliminde zergerlik óner men onyń tarihy nasihattaldy. Áielder syrǵalarynyń túr-túri, shekelikter, tumarlar, boitumarlar, tanalar men túimeler, áiel beldikteri, bilezikter men shashbaýlar kórme sórelerinen oryn aldy.
Al, ekinshi bólim «Qazaqtyń toqymashylyq óneri» dep ataldy. Ondaǵy kiiz úidiń toqyma buiymdary basqurlar, jel baýlar men salma baýlar, qorjyndar men kiizden jasalǵan aiaqqaptar, keseqaptar, kerege baý-tańǵyshtar kózdiń jaýyn alady.
Úshinshi bólimde aǵashtan oiylǵan ydys-aiaqtar toptamasy tanystyryldy. Qazaq turmysynda as tartýda, qonaqqa syi kórsetýde paidalanǵan aǵashtan jasalǵan ydys-aiaqtary, astaýlar, tabaqtar, ojaýlar, qymyz tabaqtar men keseler de kórmege qoiyldy.
Kórme jumysy 28 naýryzǵa deiin jalǵasady.
