Túrkistan qalasynda «Óńirlerdi damytý» baǵdarlamasy aiasynda salynǵan 5 qabatty 8 úi el igiligine tapsyryldy. Bul kúni baspana kezeginde turǵan áleýmettik az qamtamasyz etilgen otbasylar men múgedekter jáne jalǵyz basty analar syndy 480 otbasy baspanaly boldy, dep habarlaidy "Ult aqparat" ákimniń baspasóz qyzmetine silteme jasap.
Jańadan boi kótergen «Otyrar» shaǵyn aýdanyndaǵy qonys toiǵa Ońtústik Qazaqstan oblysynyń ákimi Janseiit Túimebaev qatysyp, turǵyndarǵa páter kiltin tabys etti.
«Elbasynyń tapsyrmasymen búginde elimizdiń árbir aimaǵynda túrli baǵdarlamalar aiasynda turǵyn úiler salynyp jatyr. Búgin mine Memleket basshysynyń kóregendi saiasatynyń nátijesin kórip, onyń kýási bolyp otyrsyzdar. Kóp jyldar boiy kezek kútken otbasylar búgin bir-bir shańyraqqa ie boldy. Bir kúnde 480 páterdiń berilýi ol bir Túrkistan emes, oblysymyz úshin úlken oqiǵa dep aitýǵa bolady. Endi munda jańadan 480 otbasy, iaǵni, úsh myńdai azamat ómir súretin bolady. Jańa qonystaryńyz qutty bolsyn dei otyryp, árbir shańyraqqa birlik pen bereke tileimin»,-dedi aimaq basshysy.
Aita keteiik, 2016 jyly atalǵan shaǵyn aýdanda 120 páterdi quraityn 2 úi jáne QIK esebinen 144 páter paidalanýǵa berilgen bolatyn. Búgin jalpy sany 480 páterdi quraityn kópqabatty segiz úi «Óńirlerdi damytý» baǵdarlamasy aiasynda oblys biýdjetinen bólingen 3 mlrd. 109 mln. teńge qarjyǵa salynǵan. Munda qonystanǵan otbasylardyń balalary úshin qazirgi kúnde balabaqsha, mektep máselesin sheshý qarastyrylyp otyr. Ol úshin jergilikti bilik memlekettik jekemenshik áriptestik aiasynda 280 oryndyq balabaqsha ǵimaratynyń qurylysyn bastamaq. Al keler jyly osynda 900 oryndyq jańa mektep ǵimaratynyń qurylysy júrgiziletin bolady. Bul qurylystardan basqa jańa aýdanda 200 oryndyq balalarǵa arnalǵan psihologiialyq-túzetý ortalyǵy salynýda.
Sonymen birge, qaladaǵy 5 myńǵa jýyq azamattardyń turǵyn úige degen suranysyn qanaǵattandyrý maqsatynda «Otyrar» shaǵyn aýdanynan «Qazaqstan ipotekalyq kompaniiasy» arqyly taǵy da 6 úidiń qurylysy júrgizilmek. Keler jyly josparlanǵan 20 kópqabatty turǵyn úi salynsa, odan bólek 150 kottedj boi túzeidi. Aita keterligi, qalanyń ákimshilik iskerlik ortalyǵy da osy shyǵys bólikten boi túzeitin bolady.
