28 jastaǵy Qymbat Sarybaiqyzy Raiana, Ráziia jáne Rábiia esimdi úshemdi dúniege ákelip, alty balanyń anasy atandy, dep habarlaidy QazAqparat.
Bir ai buryn dúniege kelgen úshemder 30 kún boiy dárigerlerdiń qaraýynda bolyp, búgin úiine shyǵaryldy. 3 uldan keiin qyzdy bolýdy armandaǵan Tinebekovter otbasy birden 3 qyzǵaldaqpen tolyqty.
«Qazir úsh qyzdyń jaǵdaiy qalypty. Aldaǵy ýaqytta da jaǵdailaryn qadaǵalap, turaqty túrde baqylap otyratyn bolamyz», - dedi perinataldy ortalyqtyń bas dárigeri Gúlbaný Jumaǵaliqyzy.
Túrkistan qalasy ákiminiń orynbasary Erlan Baqytjanuly kópbalaly otbasyǵa qala ákimniń quttyqtaýyn jetkizip, arnaiy syilyqtardy tabys etti.
Al, úshemderdiń anasy úlken qurmet kórsetken qala basshylyǵy men dárigerlerge alǵysyn aitty.
«Keremet sezim, eshteńe aita almaimyn, qatty qobaljyp júrmin. Búkil perzenthanaǵa úlken alǵys aitamyn, dárigerleri keremet! Qudaiǵa shúkir, joldasym men enem janymda boldy. Qazir úide búkil otbasym kútip otyr, óte qýanyshtymyn! Bolashaqta taǵy balalarym bolady dep oilaimyn», - dedi Qymbat.
Aita keteiik, jalpy jyl basynan beri Túrkistan qalasynda 3740 náreste týsa, onyń 16-y egizder. Al bul - jyl basynan beri qalada dúnie esigin ashqan ekinshi úshem.
