Túrkistanda 54 jastaǵy áiel kúieýiniń pyshaq jaraqatynan kóz jumdy. Qaiǵyly jaǵdaidy alǵash bolyp erli-zaiyptylardyń kenje uly baiqaǵan, dep habarlaidy ult.kz.
Kórshilerdiń aitýynsha, jas jigit anasynyń daýysyn estip, bólmege kirgen. Sol sátte áieldiń aýyr jaraqat alǵanyn kórip, birden jedel járdem shaqyrǵan. Dárigerler ony aýrýhanaǵa jetkizgenimen, 54 jastaǵy áiel jansaqtaý bóliminde qaitys bolǵan.
«Kishkentai balasy “apa, men keshigip qaldym” deidi. Uiyqtap jatqan eken. Mamamnyń daýsyn estip shyqsam, qan atqylap jatyr deidi», – dedi marqumnyń kórshisi Gúlnar Saparova.
Kórshilerdiń sózinshe, erli-zaiyptynyń shańyraq kótergenine 25 jyl bolǵan. Osy ýaqyt ishinde olar tórt balany tárbielep ósirgen. Marqum áieldiń ómir boiy úi sharýasymen ainalysqany aityldy.
Sonymen qatar kórshileri áieldiń joldasynan 13 jas kishi bolǵanyn jetkizdi. Er adamnyń bul ekinshi nekesi ekeni belgili boldy.
Jaqyndarynyń aitýynsha, otbasy syrt kózge tatý-tátti kóringen. Buǵan deiin erli-zaiyptylar arasynda qandai da bir janjal nemese keleńsiz jaǵdai bolǵany baiqalmaǵan.
Aldyn ala málimet boiynsha, janjal kezinde er adam áieline pyshaq jaraqatyn salǵan. Keiin ózi de denesine pyshaq suǵyp, ózine qol jumsamaq bolǵan. Qazir ol aýrýhanada jatyr.
Oqiǵanyń naqty mán-jaiy anyqtalyp jatyr.
