Ánshi Maqpal Júnisovanyń anasy 90 jasqa toldy. Óner iesiniń otbasy mereitoidy aǵaiyn-týystyń ortasynda shaǵyn dastarqan basynda atap ótken, dep habarlaidy ult.kz.
Ánshiniń aitýynsha, anasy balalaryna úlken toi jasap, shyǵyndalmaýdy tapsyrǵan. Sol sebepti otbasy mereitoiǵa bir ai qalǵanda bastapqy josparynan bas tartqan.
“Anamyzdan qoryqqannan bárin qaldyrdyq bir ai qalǵanda”, – dedi Maqpal Júnisova.
Týǵan kúnde túsirilgen beinejazbalardyń biri jelide tarap, kópshiliktiń kóńilin kóterdi. Kadrda ánshiniń baýyry anasynyń janynda bilep, oǵan erkelep júr. Onyń qylyǵy dastarqan basyndaǵy jaqyndaryn da kúlkige qaryq qylǵan.
Buǵan deiin Maqpal Júnisova áleýmettik jelide anasyna aq tilegin arnap, ortalaryna aman-esen júrgenine shúkirshilik etken edi.
“15 qarasha — bizdiń anamyzdyń týǵan kúni. Aramyzda bolǵanyńyzǵa Allaǵa myń shúkirler! Ǵasyr toiyńyzdy kórsek, arman joq. Alla qoldasyn, anashym!” – dep jazǵan ánshi.
Maqpal Júnisova kim?
Maqpal Muhamediiarqyzy Júnisova — qazaq estradasynyń tanymal ánshisi, Qazaqstannyń halyq ártisi, Memlekettik syilyqtyń laýreaty. 1964 jyly 11 qańtarda Qaraǵandy oblysynyń Terekti aýylynda dúniege kelgen.

Kásibi óner jolyn 1981 jyly respýblikalyq “Gúlder” án-bi ansamblinde bastaǵan. Osy ujymda toǵyz jylǵa jýyq eńbek etip, elimizde jáne shetelderde kontsert bergen. Qýatty daýsy men ándi sezimge toly oryndaý máneri arqyly tyńdarman yqylasyna bólengen.

Repertýarynda halyq ánderimen qatar týǵan jer, ana, mahabbat pen saǵynysh týraly týyndylar bar. Onyń oryndaýyndaǵy “Aqqý sazy”, “Armandastar”, “Ǵashyq júrek”, “Erketaiym”, “Jan ana”, “Máńgilik saǵynysh” sekildi ánder kópshilikke tanys.
1994 jyly “Qazaqstannyń halyq ártisi” ataǵyn ielenip, 1999 jyly Memlekettik syilyqtyń laýreaty atanǵan.