Túrkistanda bir jasar sábiin satpaq bolǵan áielge qatysty sot úkimi shyqty. Oblystyq kámeletke tolmaǵandar isteri jónindegi mamandandyrylǵan aýdanaralyq sotynyń úkimimen jas kelinshek 6 jylǵa bas bostandyǵynan aiyryldy, dep habarlaidy QazAqparat.
Aiyptalýshy ótken jyly balasyn satý kezinde ustalǵan bolatyn.
Qaraǵandy oblysynyń 27 jastaǵy turǵyny óziniń materialdyq jaǵdaiyn jaqsartý úshin bir jasar ulyn satpaq bolǵan edi.
Ol óziniń bul oiyn Túrkistan qalasynda notariýs bolyp jumys isteitin tanys áielge aitqan.
Alaida bul habardy notariýstan estigen quzyrly organ ókilderi «satyp alýshyny» taýyp, kúdiktini qylmys ústinde qolǵa túsirgen bolatyn.
Jas kelinshek ulyn 7 mln teńgege baǵalaǵan.
Osy qylmystyq quqyq buzýshylyq týraly aqparatqa bailanysty Túrkistan qalasy prokýratýrasynyń bastamasymen Qazaqstan Respýblikasynyń Qylmystyq kodeksiniń 135-baby 2-bóliginiń 12-tarmaǵymen sotqa deiingi tergep-tekserý sharalary júrgizildi.
Sotqa deiingi tergeý barysynda balanyń anasynyń qylmystyq áreketteri dálelin taýyp, is sotqa joldanǵan bolatyn.
Búginde sot úkimi zańdy kúshine endi. Al, bala bóbekter úiine jiberilgen.
