Túrkistan-Shymkent-Tashkent baǵdary boiynsha joǵary jyldamdyqty temir jol magistraliniń qurylysy bastalady. Bul týraly Úkimettiń keńeitilgen otyrysynda Premer-Ministr Asqar Mamin aitty, dep habarlaidy QazAqparat.
«Úkimet jeke kapitaldyń qatysýymen basym aýmaqtarda týristik infraqurylym qurý boiynsha belsendi sharalardy qabyldap jatyr. Biyl 1,1 trln teńgege investitsiialyq jobalardy júzege asyrý jumysy bastalady. Keleshegi zor týristik destinatsiia retinde ekotýrizmdi, ulttyq parkterdi damytý boiynsha keshendi sharalar qabyldanady. Týrister legin arttyrý úshin Túrkistan-Shymkent-Tashkent baǵdary boiynsha joǵary jyldamdyqty temir jol magistraliniń qurylysy bastalady», - dedi Asqar Mamin.
Onyń aitýynsha, bul týrizm salasynda 22 myń jańa jumys ornyn qurýǵa múmkindik beredi.
Al ekonomikanyń aralas salalarynda 100 myń jańa jumys orny ashylady.
«Ishki týrister legi 22 paiyz ósimmen shamamen 4,5 mln adamǵa jetedi. JIÓ-degi týrizm úlesi 5,2 paiyz bolady», - dedi Úkimet basshysy.
