Túrkistan oblysynda joǵalǵan jigittiń 75 million teńge qaryzy bolǵan. Ol tanystarynan alǵan aqshany qumar oiynǵa jumsap otyrypty, dep habarlaidy QazAqparat.
Lenger qalasynyń turǵyny jasy 30-ǵa jýyqtaǵan ulynyń 4 táýlikten beri iz-túzsiz ketkenin aityp, politseilerge habarlasqan.
Tólebi APB qyzmetkerleri qala kóshelerin tekserip, fotosýretin kórsetý arqyly turǵyndar arasynda surastyrý jumystaryn júrgizdi. Respýblika kóleminde tártip saqshylaryna baǵyttamalar joldanyp, joǵalǵan jigittiń airyqsha belgilerin habarlaǵan. Jaqyndary men týystary, tanystary men barýy múmkin jerler muqiiat tekserilgen. Izdeý jumystaryna Jergilikti politsiia qyzmetiniń ýchaskelik politsiia, jedel ýákilder men patrýldik politseiler jumyldyryldy. Nátijesinde tártip saqshylary joǵalǵan jigitti Almaty qalasynda júrgen jerinen tapty.
«Belgili bolǵandai, azamat óziniń tanystarynan 75 million teńge qaryzǵa aqsha alyp, ony qumar oiynǵa jumsap jibergen. Ol óz sózinde qaryzǵa alǵan aqshasyn qaitara almaǵandyqtan, Almaty qalasyna qashyp ketýge májbúr bolǵanyn jetkizdi» - delingen Túrkistan oblysy politsiia departamenti taratqan habarlamada.
Qazirgi tańda joǵalyp ketken orta jastaǵy azamat aman esen otbasyna oraldy. Ulymen qaýyshqan anasy, balasyn izdestirýde kásibilikterin kórsetip, taýyp bergen politsiia qyzmetkerlerine rizashylyǵyn bildirdi.
