Ánshi Roza Álqoja bosanǵan áielge jasalatyn kútim týraly aityp, óziniń bes balasyn dúniege ákelgende mundai qamqorlyq kórmegenin jetkizdi, dep habarlaidy ult.kz.
Óner iesiniń sózinshe, enesi kezinde oǵan jas bosanǵan áieldi kútý dástúrin bilmeitinin jáne ózine de mundai kútim jasalmaǵanyn aitqan.
Roza Álqoja bes balasyn bosanǵannan keiin uzaq demalmai, birden turmystyq tirlikke aralasqanyn eske aldy.
"Enem: “Bala týǵan kezde seni kúte almaimyn, ondaidy bilmeimin. Meni de kútpegen”, – dedi. Men bes bala týdym, eshqaisysynda kútingen joqpyn, birden jumysqa kirisip ketetinmin", – dedi ánshi.
Alaida ol bul tájiribeni óz kelinine qaitalamaýǵa sheshim qabyldaǵan. Ánshiniń aitýynsha, kelini bosanǵan kezde ony barynsha tynyqtyryp, úi sharýasyn ózi atqarǵan.
"Kelinimdi jatqyzyp qoiyp kúttim. Úi jinadym, ydys jýdym, tamaq jasadym. Óitkeni ol – meniń urpaǵymnyń anasy. Qazir aqparat kóp, kútimdi úirenýge bolady. Mal tóldegende de qaraisyń ǵoi. Onyń qasynda dúniege adam kelip jatyr. Sondyqtan ózgeristi ózimnen bastadym", – dedi Roza Álqoja.
Ánshiniń bul pikiri jas bosanǵan áielge kútim jasaý, ene men kelin arasyndaǵy qarym-qatynas jáne otbasyndaǵy qoldaý máselesin qaita talqylaýǵa sebep boldy.
Roza Álqoja kim?
Roza Álqoja – qazaqstandyq ánshi, aqyn, kompozitor ári jýrnalistika salasynda bilim alǵan óner iesi. Ol 1981 jylǵy 1 qazanda dúniege kelgen. Ánshiniń óz aitýynsha, týǵan jeri – Ońtústik Qazaqstan oblysynyń Jetisai qalasy, al balalyq shaǵy qazirgi Ózbekstan aýmaǵyndaǵy Amangeldi eldi mekeninde ótken. Roza Álqoja kishkentai kezinen ata-ájesiniń tárbiesin kórip ósip, ónerge erte aralasqan. Onyń mýzykaǵa qyzyǵýyna anasynyń yqpaly zor bolǵan. Anasy dástúrli án aityp, teatrda aktrisa, keiin muǵalim bolyp eńbek etken. Rozaǵa alty jasynan dombyra úiretip, sahnaǵa shyǵýyna da jaǵdai jasaǵan.
Roza Álqoja ál-Farabi atyndaǵy Qazaq ulttyq ýniversitetiniń jýrnalistika fakýltetin támamdaǵan. Sonymen qatar Qazaq memlekettik qyzdar pedagogikalyq ýniversitetiniń Óner jáne mádeniet fakýltetinde bilim alǵan. Stýdent kezinen túrli mádeni sharalar men baiqaýlarǵa qatysyp, án aityp, mýzyka jazýmen ainalysqan. Ol jýrnalist retinde de tájiribe jinap, baspasózde qyzmet etken. Sondai-aq «Habar» arnasyndaǵy "Jastar jyrlaidy" baǵdarlamasyn júrgizip, radioda eńbek etkenin aitqan.
Óner iesin kópshilikke keńinen tanytqan shyǵarmalardyń biri – "Men syiǵa tartqan oramal" áni. Onyń repertýarynda "Án salshy, Roza", "Júrek nazy", "Fariza", "Syrdariia", "Jylatqanyń netkeniń", "Qara kúz" sekildi ánder bar. 2008 jyly "Men syiǵa tartqan oramal" atty alǵashqy albomy jaryq kórgen. 2011 jyly Almatydaǵy Ómirbek Joldasbekov atyndaǵy Stýdentter saraiynda shyǵarmashylyq keshin ótkizgen. Roza Álqoja óz shyǵarmashylyǵynda ulttyq naqyshty saqtaýǵa erekshe mán beretinin birneshe suhbatynda aitqan.
Ánshi – bes balanyń anasy. Onyń tuńǵysh uly Beibarys 2023 jyly shańyraq kótergen. 2025 jyly Beibarystyń otbasynda sábi dúniege kelip, Roza Álqoja alǵash ret áje atandy. Óner iesi búginde ánshilikpen qatar otbasylyq qundylyqtar, tárbie jáne qoǵamdaǵy áieldiń orny týraly pikirlerimen de jii nazarǵa ilinedi.
