Kolýmbiialyq álem juldyzy Shakira alǵash ret Ortalyq Aziiada kontsert beredi. Ánshi 18 qazanda Bishkekte ótip, «Las Mujeres Ya No Lloran» álemdik týrnesi aiasynda óner kórsetedi, dep habarlaidy ult.kz.
Kontsert baǵdarlamasyna Shakiranyń ár jyldardaǵy tanymal hitterimen qatar, jańa albomyndaǵy ánder de engen. Kórermender «Hips Don’t Lie», «Whenever, Wherever», «Waka Waka», «She Wolf» sekildi áigili kompozitsiialardy jandy daýysta tyńdai alady.
GovTicket málimetinshe, bilet satylymy 1 qazanda Bishkek ýaqytymen saǵat 09:00-de bastalǵan. Bilet quny tańdalǵan sektorǵa qarai ártúrli.
Sahna aldyndaǵy Fanzone 1 jáne Fanzone 2 aimaqtaryna kirý quny 40 myń somǵa, iaǵni shamamen 458 dollarǵa deiin jetedi. Al Ground admission sektoryndaǵy bilet 27 myń som nemese 309 dollar turady.
Kontsertti otyryp tamashalaǵysy keletinder úshin de birneshe sanat qarastyrylǵan. Joǵarǵy qatarlardaǵy oryndardyń baǵasy 13,5 myń somnan bastalady. Eń arzan bilet 12 myń som, shamamen 137 dollar turady. Alaida bul oryndar sahnanyń shetinde ornalasqandyqtan, shoý tolyq kórinbeýi múmkin.
Budan bólek, bir orny 30 myń som turatyn Skybox lojalary usynylady. Olar 15-20 adamǵa arnalǵan jáne holl, asúi men barmen jabdyqtalǵan. Premiým VIP-biletter satylymǵa keiinirek shyǵarylmaq. Olardyń sany shekteýli ári baǵasy negizgi sanattardan joǵary bolady.
Uiymdastyrýshylardyń málimetinshe, sahna shyǵys tribýnanyń janynda ornalasady, al onyń artyndaǵy sektorlar kórermender úshin jabylady. Stadionǵa kirý QR-bilet arqyly júzege asady. Kontsertke 7 jastan asqan kórermender ǵana jiberiledi.
Shakira týraly ne belgili?
Shakira – kolýmbiialyq ánshi, án avtory, bishi jáne prodiýser. Tolyq aty-jóni — Shakira Isabel Mebarak Ripol. Ol 1977 jylǵy 2 aqpanda Kolýmbiianyń Barrankilia qalasynda dúniege kelgen.
Shakira álemdik mýzyka indýstriiasyndaǵy eń tanymal latynamerikalyq oryndaýshylardyń biri sanalady. Ol ispan jáne aǵylshyn tilderinde án oryndaidy. Ánshiniń halyqaralyq deńgeide tanylýyna «Whenever, Wherever», «Hips Don’t Lie», «Underneath Your Clothes», «She Wolf», «Waka Waka (This Time for Africa)» sekildi hitteri úlken yqpal etti.
Ol birneshe Grammy jáne Latin Grammy júldesiniń iegeri. 2010 jyly Ońtústik Afrika Respýblikasynda ótken fýtboldan álem chempionatynyń resmi ánderiniń biri bolǵan «Waka Waka» týyndysyn oryndap, dúniejúzine keńinen tanyldy.
Shakira mýzykalyq mansabymen qatar qaiyrymdylyq jumystarymen de ainalysady. Ol balalardyń bilim alýyna qoldaý kórsetetin jobalarǵa qatysyp, óz qory arqyly áleýmettik bastamalardy júzege asyryp keledi.
