Túrkistan oblysynda shóp artylǵan júk kóligin órtep jibergen kúdikti ustaldy, - dep habarlaidy "Ult aqparat" Polisia.kz portalyna silteme jasap.
Oqiǵa 8 qazanda saǵat 21.50 shamasynda bolǵan. Sairam APB kezekshi bólimine aýyl kósheleriniń birinde shóp artylǵan GAZ 53 júk kóligi janyp jatqany týraly habarlama túsken.
"Oqiǵa ornyna jedel-tergeý tobynyń qyzmetkerleri birden shyqty. Tártip saqshylary belgisiz bireý Báidibek aýdanynyń turǵynyna tiesili 280 býma shóp tielgen júk kóligin órtep jibergenin anyqtady. Jábirlenýshige keltirilgen shyǵynnyń jalpy kólemi shamamen alty million teńgege jýyq", - delingen habarlamada.
Oqiǵanyń tolyq mán-jaiyn anyqtaý maqsatynda politseiler qajetti is-sharalardy júrgizip, kýálardan jaýap alǵan. Beinebaqylaý kameralaryn teksergen.
"Nátijesinde jedel ýákilder júk kóligine kelip, ondaǵy shópti órtep jibergen kúdikti adamnyń beinesin kórdi. Ol ot qoiǵannan keiin oryndyqqa otyryp, órtti baqylaǵan. Jedel-izdestirý is-sharalary barysynda politsiia qyzmetkerleri kúdikti retinde Sairam aýdanynyń turǵynyn anyqtady. Er adam mas kúide belgisiz sebeptermen jábirlenýshiniń kóligin órtep jibergen", - delingen habarlamada.
Qazirgi ýaqytta derek QR QK-niń 202-baby "Bótenniń múlkin qasaqana joiý nemese búldirý" boiynsha tirkelip, sotaldy tergeý amaldary júrgizilip jatyr. Kúdikti qamaýǵa alynǵan.
