Túrkistan oblysy, Tólebi aýdanynyń taýlarynda oqýshylardyń joǵalýyna jáne olardyń biriniń qaza bolýyna bailanysty qylmystyq is qozǵaldy. Bul týraly óńirlik Politsiia departamentiniń baspasóz hatshysy Saltanat Qarakózova málim etti, dep habarlaidy "Ult aqparat".
15 maýsym kúni Túrkistan oblysynda taýǵa demalýǵa shyqqan oqýshylar joǵalyp ketkeni týraly jazǵan bolatynbyz. «Birkólik» demalys aimaǵynda 22 oqýshy men 3 eresek adam taý bókterine shyǵyp, 3 oqýshy adasyp qalǵan. 16 maýsym saǵat 00:58-de Shymkent qalalyq TJD-nyń izdestirý toby jardan qulap ketken 2003 jyly týǵan jasóspirimniń denesin taýyp, tómenge túsirgen edi.
«Bul jait Tólebi aýdandyq politsiia bóliminde tirkelip, QR QK-niń 141 babyna sáikes sotqa deiingi tergeý amaldary júrgizilýde. Bolǵan oqiǵanyń mán-jaiy tergeý barysynda anyqtalady», - dedi Saltanat Qarakózova.
Qutqarý qyzmetiniń málimetinshe, taýǵa shyqqan jasóspirimderdiń barlyǵy - Saryaǵash aýdany, Aqjar aýyly, Abylaihan atyndaǵy №28 orta mekteptiń 10-synyp oqýshylary.
Qazirgi ýaqytta taýǵa ketken 2 oqýshynyń júrgen jeri anyqtalyp, olarmen bailanys ornatylǵan. Qutqarýshylar alpinistik qural-jabdyqtardy qoldana otyryp, olardyń bireýin túsirip úlgergen. Al, ekinshi balany qutqarý operatsiiasy áli de júrgizilýde. Alaida, jartasty jerler, biik taýlar men tik betkeilerge bailanysty qutqarý jumystary qiyndai túsýde.
