Qazaqstanda plastikalyq hirýrgter ortasha jalaqy mólsheri boiynsha 180-nen astam meditsinalyq mamandyqtyń ishinde ekinshi orynǵa shyqty. Olar aiyna orta eseppen 2,1 million teńgeden astam jalaqy alady, dep habarlaidy ult.kz.
Data Hub málimeti boiynsha, 2026 jylǵy sáýirde júrgizilgen densaýlyq saqtaý jáne áleýmettik qyzmet kórsetý kásiporyndaryn iriktemeli zertteý nátijesine sáikes, eń joǵary jalaqy jaq-bet hirýrgterine tiesili. Olardyń ortasha eseptelgen ailyǵy 2 million 384 myń teńge bolǵan.
Ekinshi orynda – plastikalyq hirýrgter. Olardyń ortasha jalaqysy 2 million 146 myń teńgege jetken. Bul – ortasha tabysy 2 million teńgeden asatyn jalǵyz eki meditsinalyq mamandyq.
Úshinshi orynǵa ortasha jalaqysy 1 million 256 myń teńge bolatyn tsitopatolog dárigerler jaiǵasqan.
Jalaqy mólsheri boiynsha kelesi oryndarda:
- Tótenshe jaǵdailar men apattar meditsinasynyń dárigerleri – 864 myń teńge;
- balalar kombýstiologteri (kúiik jaraqattaryn emdeitin dárigerler) – 833 myń teńge;
- fýnktsionaldyq diagnostika kardiologtary – 821 myń teńge;
- rentgenhirýrgter – 803 myń teńge;
- kardiohirýrgter – 729–758 myń teńge;
- eresekterge qyzmet kórsetetin angiohirýrgter – 737 myń teńge.
Zertteý nátijesi nege ózgerdi?
Zertteý avtorlary reiting nátijeleri iriktemeniń qurylymyna bailanysty ózgerýi múmkin ekenin eskertedi. Kásiporyn neǵurlym iri bolsa, zertteýge onyń qyzmetkerleriniń soǵurlym az bóligi qamtylady. Mysaly, shamamen 5 myń adam jumys isteitin uiymda árbir júzinshi qyzmetkerdiń jalaqysy ǵana esepke alynýy múmkin.
Bul jaǵdai 2025 jylmen salystyrǵanda reitingtiń kúrt ózgerýine ishinara áser etken. Byltyr eń joǵary jalaqy alatyn dárigerler qatarynda kardiohirýrgter kósh bastap, olardyń ortasha ailyǵy shamamen 1 million teńge bolǵan. Al plastikalyq jáne jaq-bet hirýrgteri úzdik 100 mamandyqtyń qataryna da kirmegen. Olardyń ortasha jalaqysy 500 myń teńgeden tómen bolǵan.
Aita keteiik, zertteýde kórsetilgen somalar – salyqtar men basqa da mindetti tólemder ustalmaǵanǵa deiingi eseptelgen jalaqy mólsheri. Sondyqtan dárigerlerdiń qolǵa alatyn naqty tabysy budan tómen bolýy múmkin.
