Bul týraly Mádeniet jáne aqparat ministrligi ókilderi habarlady.
Ortalyq mýzeidiń arheologiia bóliminiń mamandary Túrkistan oblysy, Sozaq aýdanyndaǵy Qyzylkól aýyly mańynda ornalasqan arheologiialyq eskertkishte dalalyq zertteý jumystaryn aiaqtady. Zertteý obektisi Qyzylkól tarihi-mádeni nysanda ornalasqan Ǵibadathana jáne eki qorǵan boldy. Nátijesinde, qańly mádenietine qatysty, b.z.d. II ǵasyrǵa jatatyn biregei artefaktiler tabyldy.
"Qazba jumystary kezinde iri qara jáne usaq maldyń súiekteri men múiizderi, tas dánúkkish, keli, diirmen t.b. eńbek quraldarynyń bólikteri, qysh ydys tutqalary, kiimge arnalǵan túime fragmentteri alyndy. Ǵibadathananyń batys bóliginde ashylǵan bólmeniń ishinde 60 sm tereńdikte ǵuryptyq buiym (kýrilnitsa) ydysynyń kishkene bóligi saqtalǵan tsilindr pishindi, tabany jaipaq tuǵyr tabyldy", - delingen habarda.
Eskertkishtiń biik taýlar men kólderge jaqyn ornalasýy, ǵibadathananyń erekshe qurylymy men tabylǵan jádigerlerdiń túrleri qurylystyń ǵuryptyq ǵibadathana retinde paidalanylǵanyn kórsetse, tas quraldar eginshiliktiń, atap aitqanda, egin jinaýdyń damyǵanyn kórsetedi.
Ortalyq mýzei arheologtary Qazaqstannyń kóne tarihynyń jańa paraqtaryn asha otyryp, elimizdiń ár óńirindegi tarihi nysandarda arheologiialyq qazba jumystaryn júrgizýdi aldaǵy ýaqytta da júieli túrde jalǵastyrýdy josparlap otyr.
