Belgili telejýrnalist Dana Nurjigit Janar Baisemizdiń podkastynda jeke ómirine qatysty buryn kópshilikke aita bermegen jaittarmen bólisti. Ol marqum jýrnalist Vladimir Rerihpen qalai tanysyp, otbasyn qurǵanyn, kóp jyl kútken sábiiniń densaýlyǵyna bailanysty qiyndyqtardy jáne alǵashqy nekesiniń nelikten ajyrasýmen aiaqtalǵanyn baiandady, dep habarlaidy ult.kz.
Dana Nurjigittiń sózinshe, Vladimir Rerih oǵan alǵash sezimin bildirgen kezde zańdy nekede bolǵan. Jýrnalist mundai qarym-qatynasty qabyldai almaitynyn aityp, bolashaq jaryna naqty talap qoiǵan.
"2001-de biz birge tura bastadyq. Ońai bolǵan joq. Ol óte ádebi adam edi ǵoi. Ádebietke ǵashyq, sózge ǵashyq filolog. Joq, men kóleńkede ómir súretin kóńildes bola almaimyn. Sen óziń bir jaǵyna shyq, men buǵan kelispeimin dedim", – dep eske aldy ol.
Osylaisha Dana ózge adamnyń otbasylyq ómirine aralasqysy kelmeitinin birden bildirgen. Keiin Vladimir burynǵy nekesin toqtatyp, ekeýi shańyraq kótergen. Alaida olardyń qosylýy sol kezdegi áriptesteri men ainalasyndaǵy adamdar arasynda túrli áńgimege sebep bolǵan. Tipti Danany ózgeniń otbasyn buzdy dep aiyptaǵandar da kezdesken.
Podkast júrgizýshisi Janar Baisemiz jýrnalisten Vladimir sóz salǵanǵa deiin oǵan kóńili bolǵan-bolmaǵanyn surady. Dana Rerihtiń sol kezde redaktsiiadaǵy eń syily ári kópshiliktiń yqylasyna bólengen azamattardyń biri bolǵanyn aitty.
"Búkil redaktsiia ol kisige ǵashyq boldy. Qazaq redaktsiiasynyń qyzyna sóz salyp, ǵashyq bolǵany, meniń oiymsha, barlyǵy úshin sensatsiia boldy", – dedi ol.
Telejýrnalist burynǵy jubaiynyń bilimdiligine, ádebietke degen súiispenshiligine jáne adamgershilik qasietterine erekshe toqtaldy. Onyń aitýynsha, Vladimir ózin eń aldymen jeke tulǵa retinde baǵalap, árdaiym qurmet kórsetken. Dana olardyń arasyndaǵy ult aiyrmashylyǵy eshqashan basty másele bolmaǵanyn, kerisinshe, ózara syilastyq pen rýhani jaqyndyq ekeýin tabystyrǵanyn jetkizdi. Burynǵy jary týraly estelikterin aitqan sátte jýrnalist tolqyp, kózine jas aldy.
"Búkil janym, tánim balama ketti"
Suhbat barysynda Dana Nurjigit ana ataný jolynda bastan ótkergen aýyr kezeńin de eske aldy. Onyń aitýynsha, erli-zaiyptylar perzent súiýdi on jyl kútken. Alaida kópten kútken júktilik qýanyshymen birge úlken alańdaýshylyq ta kelgen. Júktiliktiń besinshi aiynda dárigerler qursaqtaǵy balanyń bir ókpesine suiyqtyq jinalǵanyn anyqtaǵan.
Mamandar sábidiń densaýlyǵyna qatysty ózge de qaýipter bolýy múmkin ekenin eskertken. Sondyqtan Dana balasy dúniege kelgennen keiin bar ýaqytyn onyń densaýlyǵyn jaqsartýǵa arnaǵan.
"Men Álimdi on jyl kúttim. Búkil janym, tánim áljýaz bolyp týǵan balaǵa ketti. Kúieýdi nazarsyz qaldyrdym. Volodia nazarsyz bolyp ketti. Óitkeni maǵan balany qutqarý kerek boldy", – dedi jýrnalist.
Dananyń aitýynsha, dál osy ýaqytta Vladimir Rerihtiń de ómirinde kúrdeli kezeń bastalǵan. Ol uzaq jyl eńbek etken "Habar" telearnasyndaǵy qyzmetinen ketkennen keiin aýyr psihologiialyq kúizeliske túsken.
Jýrnalist burynǵy jubaiynyń shyǵarmashylyq qabiletin joǵary baǵalaitynyn aityp, onyń stsenarist, akter jáne rejisser retinde de úlken jetistikterge jete alatyn múmkindigi bolǵanyn jetkizdi. Alaida kásibi ómirindegi ózgerister Vladimirge aýyr soqqy bolyp tigen. Dana onyń jumysynan ketýine bailanysty jaǵdaidy ómiriniń sońyna deiin umyta almaǵanyn aitty. Sondai-aq ol burynǵy jubaiynyń senimine kirgen adamnyń áreketin satqyndyq retinde qabyldaǵanyn jetkizdi. Degenmen suhbattyń atalǵan bóliginde naqty kim týraly aityp otyrǵanyn ashyp kórsetpedi.
"Basqa adam onyń jan dúniesin túsinip ketti"
Dana Nurjigit otbasylyq ómiriniń aiaqtalýyna tek burynǵy kúieýin kinálamaitynyn aitty. Onyń pikirinshe, sol kezeńde erli-zaiyptylardyń ekeýi de bir-birine jetkilikti kóńil bóle almaǵan. Bir jaǵynan, jýrnalist balasynyń densaýlyǵy úshin kúresse, ekinshi jaǵynan, Vladimir kásibi daǵdarysty bastan ótkergen. Osyndai jaǵdaida olardyń arasyndaǵy emotsionaldyq bailanys álsirei bastaǵan.
"Al endi ekeýmizdiń eki jaqqa ketkenimizge ekeýmizdiń de kinámiz bar siiaqty", – dedi ol.
Telejýrnalist óziniń bar nazary balasyna aýǵan kezde kúieýiniń ishki kúizelisin basqa adamnyń túsinip, oǵan qoldaý kórsetkenin jasyrmady.
"Men álek bolyp kettim degen kezde, sol kóńil kúidi, sol alai-dúlei jan dúniesindegi nárseni basqa adam túsinip ketti, basqa adam kóńil bóldi", – dep bólisti Dana.
Osylaisha olardyń qarym-qatynasy birtindep ózgerip, aqyrynda eki jaqqa ketýge týra kelgen.
Dana sol kezde otbasyn saqtap qalýǵa úmittenip, jaǵdaidyń ońalýyn bir jyl boiy kútkenin jetkizdi. Ol ajyrasýǵa alyp kelgen oqiǵalardy oi eleginen ótkizip, óz áreketterine de syn kózben qaraǵan. Keiin Vladimir Rerih úshinshi ret otbasyn qurǵan. Al Dana Nurjigit ótken ómirine kóz júgirte otyryp, olardyń ajyrasýyna bir ǵana adamnyń áreketi emes, birneshe kúrdeli jaǵdaidyń qatar kelýi áser etkenin túsindirdi.
Jýrnalistiń áńgimesinen belgili bolǵandai, uzaq jyl kútken perzentiniń densaýlyǵy úshin kúres pen jubaiynyń kásibi kúizelisi olardyń otbasylyq ómirindegi eń aýyr synaqtardyń birine ainalǵan.
Dana Nurjigit kim?
Dana Nurjigit – qazaqstandyq belgili telejýrnalist, telejúrgizýshi, mediatrener jáne qoǵam qairatkeri. Ol 1972 jyly Qyzylorda oblysynyń Qazaly aýdanyndaǵy Laqaly aýylynda dúniege kelgen. Bolashaq telejúrgizýshi alǵashqy bilimin Qyzylorda qalasyndaǵy №198 mektepte alǵan. Keiin otbasy Almaty oblysynyń Esik qalasyna kóship, Dana Ahmet Jubanov atyndaǵy respýblikalyq mýzyka mektebinde bilimin jalǵastyrǵan. Ol Qurmanǵazy atyndaǵy Qazaq ulttyq konservatoriiasyn fortepiano mamandyǵy boiynsha támamdaǵan. Eńbek jolyn 1994 jyly Abai atyndaǵy Almaty memlekettik ýniversitetinde kontsertmeister bolyp bastaǵan. 1996 jyly Kúlásh Baiseiitova atyndaǵy respýblikalyq mýzykalyq kolledjde qyzmet atqarǵan. 1997 jyly televiziia salasyna kelip, jýrnalistik mansabyn bastaǵan. Alǵash ret 1997 jyldyń 18 aqpanynda tikelei efirge shyqqan. Keiin "Habar" agenttiginde jańalyqtar júrgizýshisi, redaktor, prodiýser jáne kórkemdik jetekshi qyzmetterin atqarǵan.
Sonymen qatar "Sálem, Qazaqstan!" baǵdarlamasynda jumys istep, CaspioNet jobasynyń prodiýseri bolǵan. Qazaqstan ulttyq telearnasyndaǵy "Dara jol" baǵdarlamasy arqyly da kórermenge keńinen tanyldy. 2019 jyldyń tamyzynda Qazaqstan Respýblikasy Parlamenti Senatynyń depýtaty bolyp taǵaiyndalǵan. Ol 2023 jylǵa deiin senator qyzmetin atqaryp, bilim berý, balalardyń quqyqtaryn qorǵaý jáne áleýmettik máselelerge qatysty jumystarǵa qatysqan. Dana Nurjigit búginde jýrnalistika salasyndaǵy tájiribesimen bólisip, qoǵamdyq máseleler jóninde pikir bildirip júrgen tanymal tulǵalardyń biri.
