Tanymal ánshi Tóreǵali Tóreáli Premer-ministrdiń birinshi orynbasary Nurlybek Nálibaevpen kezdesip, oǵan degen qurmetin bildirdi. Óner iesi áleýmettik jelidegi paraqshasynda áserli jazba jariialady, dep habarlaidy ult.kz.
Ánshi Nurlybek Nálibaevpen týǵan kúnderi qatar keletinin aityp, ekeýiniń de Syr óńiriniń týmasy ekenin atap ótti. Onyń sózinshe, araǵa biraz ýaqyt salyp qaita qaýyshý erekshe áser qaldyrǵan.
"Janashyr aǵalar bolady… 13 qazan Nurlybek Mashbekuly aǵamnyń týǵan kúni. 14 qazan meniń týǵan kúnim. Bir kúnniń aralyǵynda týǵan, Syrdyń topyraǵynan túlegen bizdi taǵdyrdyń osylai toǵystyrǵanyna da bir sát oi júgirtesiń", – dep jazdy óner iesi.
Tóreǵali Tóreáli bul jolǵy kezdesýde tek amandyq surasyp qana qoimai, aldaǵy josparlar men túrli máseleler tóńireginde áńgimeleskenderin jetkizdi. Ol ýaqyt ótse de, adamdar arasyndaǵy syilastyqtyń saqtalýy mańyzdy ekenin aitty.
Ánshi Nurlybek Nálibaevtyń shyǵarmashylyq ortaǵa jaqyn ekenin de tilge tiek etti. Ásirese, onyń aitys ónerine qurmetpen qarap, aqyndarǵa qoldaý kórsetetinin joǵary baǵalady.
"Nurlybek aǵa jalpy ónerdiń, ónerpazdardyń janashyry. Aitysqa degen qurmeti erekshe. Aqyndarymyzdy da qoldap kele jatyr", – dedi ánshi.
Óner iesiniń aitýynsha, keibir kezdesýler adamǵa jańa oi salyp, bolashaqqa degen kózqarasyn ózgertýi múmkin. Ol Nurlybek Nálibaevpen júzdesýden jaqsy áser alǵanyn jasyrmady.
Jazbasynyń sońynda Tóreǵali Tóreáli sheneýnikti týǵan kúnimen quttyqtap, qyzmetine tabys tiledi.
"Nurlybek aǵa, týǵan kúnińiz qutty bolsyn! Jasyńyzǵa jas qosylyp, ǵumyryńyz uzaq, berekeli bolsyn. Qazaq eliniń abyroiyn asqaqtatyp, elge paidaly isterdiń basynan tabyla berińiz! Biz jaqta taý joq, biraq taýyńdy qoparyp tastaityn aǵalar bar…", – dep túiindedi ol.
Osylaisha ánshi kópshilikke Nurlybek Nálibaevpen aradaǵy syilastyǵyn kórsetip, onyń óner adamdaryna jasaǵan qoldaýyn erekshe atap ótti.
Nurlybek Nálibaev kim?
Nurlybek Mashbekuly Nálibaev – Qazaqstannyń memleket qairatkeri, Premer-ministrdiń birinshi orynbasary. Ol 1976 jyly 13 qazanda Qyzylorda oblysynyń Jańaqorǵan aýdanynda dúniege kelgen. Qazaq memlekettik agrarlyq ýniversitetin ekonomist-menedjer, Qazaq gýmanitarlyq zań ýniversitetin zańger mamandyǵy boiynsha támamdaǵan.
Eńbek jolyn 1997 jyly munai salasynda bastap, keiin túrli kásiporyndarda basshylyq qyzmet atqarǵan. 2008–2013 jyldary Shieli aýdanynyń, 2013–2021 jyldary Qyzylorda qalasynyń ákimi bolǵan. 2022–2026 jyldary Qyzylorda oblysyn basqaryp, 2026 jylǵy 6 mamyrda Qazaqstan Premer-ministriniń birinshi orynbasary bolyp taǵaiyndalǵan.
Tóreǵali Tóráli kim?
Tóreǵali Tóreáli – qazaqstandyq tanymal ánshi, aitysker aqyn ári akter. Onyń tolyq aty-jóni – Tóreǵali Tóreáliuly Álihanov. Óner iesi 1992 jyly 14 qazanda Qyzylorda oblysynyń Baiqońyr qalasynda dúniege kelgen. Ol Almatydaǵy T. Júrgenov atyndaǵy Qazaq ulttyq óner akademiiasynyń kolledjinde akter mamandyǵy boiynsha bilim alǵan. Shyǵarmashylyq jolyn aitys ónerinen bastap, birneshe stýdenttik aitysta jeńimpaz atanǵan. Sondai-aq respýblikalyq aqyndar aitysynda júldeli oryndarǵa ie bolǵan. Keiin estradaǵa bet buryp, kópshilikke "Uly dala balasy" degen atpen tanyldy. Ánshi "Otandy súiý – imannan" týyndysy arqyly tyńdarman yqylasyna bólendi
2015 jyly Erke Esmahanmen birge oryndaǵan "Allo" áni onyń tanymaldyǵyn arttyrdy. 2016 jyly "Birtúrli qyz" áni úshin "Jyl tańdaýy" ulttyq televiziialyq mýzykalyq syilyǵyn ielendi. Sol jyly "Uly dala balasy" atty shyǵarmashylyq keshin ótkizip, onyń televiziialyq nusqasy "Qazaqstan" ulttyq arnasynan kórsetildi. 2017 jyly Almatydaǵy Respýblika saraiynda jandy daýysta kontsert berdi.
Onyń repertýarynda "Saǵynysh", "Túsimdegi qyz", "Erke qyz" jáne "Naizaǵai bolyp" sekildi ánder bar. Sonymen qatar ánshi "Qairan 18", "Boz jorǵa" jáne "Qazaǵym" shyǵarmalaryn oryndaǵan. Tóreǵali Tóreáli aitys pen estradany qatar alyp júrgen ónerpaz retinde qazaq tyńdarmandaryna keńinen tanylǵan.
