Танымал әнші Төреғали Төреәлі Премьер-министрдің бірінші орынбасары Нұрлыбек Нәлібаевпен кездесіп, оған деген құрметін білдірді. Өнер иесі әлеуметтік желідегі парақшасында әсерлі жазба жариялады, деп хабарлайды ult.kz.
Әнші Нұрлыбек Нәлібаевпен туған күндері қатар келетінін айтып, екеуінің де Сыр өңірінің тумасы екенін атап өтті. Оның сөзінше, араға біраз уақыт салып қайта қауышу ерекше әсер қалдырған.
"Жанашыр ағалар болады… 13 қазан Нұрлыбек Машбекұлы ағамның туған күні. 14 қазан менің туған күнім. Бір күннің аралығында туған, Сырдың топырағынан түлеген бізді тағдырдың осылай тоғыстырғанына да бір сәт ой жүгіртесің", – деп жазды өнер иесі.
Төреғали Төреәлі бұл жолғы кездесуде тек амандық сұрасып қана қоймай, алдағы жоспарлар мен түрлі мәселелер төңірегінде әңгімелескендерін жеткізді. Ол уақыт өтсе де, адамдар арасындағы сыйластықтың сақталуы маңызды екенін айтты.
Әнші Нұрлыбек Нәлібаевтың шығармашылық ортаға жақын екенін де тілге тиек етті. Әсіресе, оның айтыс өнеріне құрметпен қарап, ақындарға қолдау көрсететінін жоғары бағалады.
"Нұрлыбек аға жалпы өнердің, өнерпаздардың жанашыры. Айтысқа деген құрметі ерекше. Ақындарымызды да қолдап келе жатыр", – деді әнші.
Өнер иесінің айтуынша, кейбір кездесулер адамға жаңа ой салып, болашаққа деген көзқарасын өзгертуі мүмкін. Ол Нұрлыбек Нәлібаевпен жүздесуден жақсы әсер алғанын жасырмады.
Жазбасының соңында Төреғали Төреәлі шенеунікті туған күнімен құттықтап, қызметіне табыс тіледі.
"Нұрлыбек аға, туған күніңіз құтты болсын! Жасыңызға жас қосылып, ғұмырыңыз ұзақ, берекелі болсын. Қазақ елінің абыройын асқақтатып, елге пайдалы істердің басынан табыла беріңіз! Біз жақта тау жоқ, бірақ тауыңды қопарып тастайтын ағалар бар…", – деп түйіндеді ол.
Осылайша әнші көпшілікке Нұрлыбек Нәлібаевпен арадағы сыйластығын көрсетіп, оның өнер адамдарына жасаған қолдауын ерекше атап өтті.
Нұрлыбек Нәлібаев кім?
Нұрлыбек Машбекұлы Нәлібаев – Қазақстанның мемлекет қайраткері, Премьер-министрдің бірінші орынбасары. Ол 1976 жылы 13 қазанда Қызылорда облысының Жаңақорған ауданында дүниеге келген. Қазақ мемлекеттік аграрлық университетін экономист-менеджер, Қазақ гуманитарлық заң университетін заңгер мамандығы бойынша тәмамдаған.
Еңбек жолын 1997 жылы мұнай саласында бастап, кейін түрлі кәсіпорындарда басшылық қызмет атқарған. 2008–2013 жылдары Шиелі ауданының, 2013–2021 жылдары Қызылорда қаласының әкімі болған. 2022–2026 жылдары Қызылорда облысын басқарып, 2026 жылғы 6 мамырда Қазақстан Премьер-министрінің бірінші орынбасары болып тағайындалған.
Төреғали Төрәлі кім?
Төреғали Төреәлі – қазақстандық танымал әнші, айтыскер ақын әрі актер. Оның толық аты-жөні – Төреғали Төреәліұлы Әлиханов. Өнер иесі 1992 жылы 14 қазанда Қызылорда облысының Байқоңыр қаласында дүниеге келген. Ол Алматыдағы Т. Жүргенов атындағы Қазақ ұлттық өнер академиясының колледжінде актер мамандығы бойынша білім алған. Шығармашылық жолын айтыс өнерінен бастап, бірнеше студенттік айтыста жеңімпаз атанған. Сондай-ақ республикалық ақындар айтысында жүлделі орындарға ие болған. Кейін эстрадаға бет бұрып, көпшілікке "Ұлы дала баласы" деген атпен танылды. Әнші "Отанды сүю – иманнан" туындысы арқылы тыңдарман ықыласына бөленді
2015 жылы Ерке Есмаханмен бірге орындаған "Алло" әні оның танымалдығын арттырды. 2016 жылы "Біртүрлі қыз" әні үшін "Жыл таңдауы" ұлттық телевизиялық музыкалық сыйлығын иеленді. Сол жылы "Ұлы дала баласы" атты шығармашылық кешін өткізіп, оның телевизиялық нұсқасы "Qazaqstan" ұлттық арнасынан көрсетілді. 2017 жылы Алматыдағы Республика сарайында жанды дауыста концерт берді.
Оның репертуарында "Сағыныш", "Түсімдегі қыз", "Ерке қыз" және "Найзағай болып" секілді әндер бар. Сонымен қатар әнші "Қайран 18", "Боз жорға" және "Қазағым" шығармаларын орындаған. Төреғали Төреәлі айтыс пен эстраданы қатар алып жүрген өнерпаз ретінде қазақ тыңдармандарына кеңінен танылған.
