Qazaqstan, Túrkiia jáne Grýziianyń quqyq qorǵaý organdary transulttyq uiymdasqan qylmystyq toptyń qyzmetin toqtatýǵa baǵyttalǵan aýqymdy halyqaralyq arnaiy operatsiia júrgizdi. , dep habarlaidy ult.kz.
Polisia.kz málimetinshe, arnaiy operatsiia Qazaqstan Ishki ister ministri bastaǵan delegatsiialardyń Grýziia, Túrkiia jáne Ázerbaijanǵa jumys saparlarynan keiin quqyq qorǵaý organdary arasyndaǵy yntymaqtastyqtyń kúsheiýi nátijesinde júzege asqan.
Eske salsaq, ótken jyly Ystambulda Qazaqstan azamaty Ismailov qarýdan atylǵan oqtan kóz jumǵan bolatyn. Úsh eldiń politsiiasy júrgizgen birlesken tergeý barysynda atalǵan qylmysqa qatysy bar eki kúdikti ustalyp, keiin kisi óltirýdi uiymdastyrýshy men tapsyrys berýshi anyqtalǵan. Olar transulttyq uiymdasqan qylmystyq toptyń músheleri ári halyqaralyq izdeýde júrgen.
IIM Uiymdasqan qylmysqa qarsy kúres departamentiniń ókili Qýandyq Alpystyń aitýynsha, Qazaqstan, Túrkiia jáne Grýziia aýmaǵynda qylmystyq top múshelerin ustaý boiynsha kezeń-kezeńimen arnaiy operatsiia ótkizilgen.
«Almaty qalasynda atalǵan qylmystyq qurylymnyń birneshe múshesi ustaldy. Olar qarý qoldanylǵan birneshe shabýylǵa qatysy bar degen kúdikke ilindi», – dedi ol.
Tergeý barysynda alynǵan derekter osy toptyń Qazaqstan aýmaǵynda jasaǵan ózge de aýyr qylmystaryn ashýǵa múmkindik bergen. Atap aitqanda, Almatyda 2025 jylǵy tamyzda qala turǵynyn óltirýge oqtalǵan killerlerdiń biri ustalyp, odan qylmys quraly bolǵan tapansha tárkilengen. Bul is boiynsha sotqa deiingi tergeý aiaqtalyp, materialdar sotqa joldandy.
IIM málimetinshe, qylmystyq top diaspora ókilderiniń biznesine yqpal etý úshin qylmystyq ideologiia elementterin paidalanǵan. Sonymen qatar Grýziia aýmaǵynda da osy transulttyq qylmystyq qurylymmen bailanysy bar, birneshe aýyr qylmysqa qatysy bar kúdiktiler qolǵa túsken.
Qazir barlyq qylmystyq faktiler boiynsha dáleldemeler jinalyp, iske qatysy bolýy múmkin ózge tulǵalardy anyqtaý jumystary jalǵasýda. Sondai-aq toptyń uiymdastyrýshysyn qoldanystaǵy zańnamaǵa sáikes qylmystyq jaýapkershilikke tartý sharalary júrgizilip jatyr.
IIM málimetinshe, arnaiy operatsiia nátijesinde shetelden basqarylǵan qylmystyq yqpal etý arnalarynyń joly kesilip, elimizde ózge de aýyr qylmystardyń aldyn alýǵa múmkindik týǵan.
Aita keteiik, buǵan deiin Túrkiiada 18 jastaǵy Qazaqstan azamatynyń qaza tapqany habarlanǵan bolatyn.
