Prezident Qasym-Jomart Toqaev Túrki halyqtarynyń ortaq jazba murasyn zertteýge arnalǵan «jol kartasyn» ázirleýdi usyndy, dep habarlaidy "Ult aqparat" Aqordanyń baspasóz qyzmetine silteme jasap.
«Túrki elderiniń rýhani derekkózderin zerdeleitin jobalarǵa erekshe kóńil bólgenimiz abzal. Biyl Túrki akademiiasy Mońǵoliiada júrgizgen qazba jumysynyń nátijesinde mańyzdy jańalyq ashty. Ekinshi Túrki qaǵanatyn qaita tiriltken Qutlyq qaǵannyń keshenin tapty. Bul – «túrki» degen sózi bar eń kóne jazba eskertkish.
Osy oraida, men Túrki halyqtarynyń ortaq jazba murasyn zertteýge arnalǵan «jol kartasyn» ázirleýdi usynamyn. Ol úshin elderimizdiń muraǵattary ózara ashyq bolýyn qamtamasyz etý qajet. Keleshekte sonyń negizinde Túrki memleketteri uiymynyń «Tsifrlyq kitaphanasyn» qurýǵa bolady. Bul jumys qundy qujattar men sirek kitaptardy urpaqqa mura etip qaldyrýǵa múmkindik berer edi» - dedi Toqaev Túrki memleketteri uiymy sammitiniń otyrysynda.
Sondai-aq, ol Túrki memleketteri uiymynyń qyzmetin BAQ arqyly belsendi túrde dáripteý kerek ekenin aitty.
"Taǵy bir mańyzdy máselege toqtalǵym keledi. Túrki memleketteri uiymynyń qyzmetin buqaralyq aqparat quraldary arqyly belsendi túrde dáripteýimiz kerek. Bul – óte qajet nárse. Osy jumysty elderimizdiń ishindegi aqparat quraldary jáne belgili halyqaralyq agenttikter aiasynda júrgizýge bolady. Sebebi, álem qaýymdastyǵy bizdiń túrki álemindegi yqpaldastyqty nyǵaitý úshin jasap jatqan aýqymdy jumysymyz týraly bilýi qajet.
Shyndyǵyn aitsaq, jahan jurtshylyǵy bizdiń uiymnyń jumysy týraly áli de jaqsy bile bermeidi. Degenmen qazir Túrki yntymaqtastyǵy ideiasy búkil álemniń nazaryn ózine aýdara bastady. Túrki órkenieti týraly habar beretin qundy derekter jer sharynyń túrli aimaqtary men qurlyqtarynan tabylyp jatyr.
Bul – bizdiń elderimizge ortaq qundylyqtar. Sondyqtan qolda bar tarihi jáne tildik derekterdi júielep, retke keltirý mańyzdy mindet dep oilaimyn. Ǵylymi institýttardyń jáne mekemelerdiń aiasynda belsendi jumys uiymdastyryp, ony álem jurtshylyǵyna keńinen tanystyrýymyz kerek. Uiymnyń jumysy diplomatiialyq sammitter men qorytyndy qujattary bar kezdesýlermen ǵana shektelip qalmaǵany jón. Túrki memleketteri uiymy barsha túrki álemindegi halyqtardy jaqyndastyratyn yqpaldy ortalyqqa ainalýy qajet dep sanaimyn" - dedi Memleket basshysy.
