Qazaqstanda týrizmdi damytýǵa baǵyttalǵan jumystar kúsheiip keledi. Úkimettiń málimetinshe, salaǵa salynǵan investitsiia kólemi sońǵy eki jylda aitarlyqtai artqan, dep habarlaidy ult.kz Úkimet saityna silteme jasap.
2025 jyldyń qorytyndysy boiynsha týrizmniń el ekonomikasyna qosqan úlesi 5 trln teńgege jetip, salada 600 myńnan astam adam jumyspen qamtyldy.
Qazir elimizde jalpy quny 1,3 trln teńge bolatyn 328 investitsiialyq joba júzege asyrylyp jatyr. Olardyń iske qosylýy 10 myńǵa jýyq turaqty jumys ornyn ashýǵa múmkindik beredi. Sondai-aq halyqaralyq deńgeidegi 25 jańa qonaqúi kesheni boi kótermek.
Qazaqstanǵa týrister kóptep kele bastady
2025 jyly Qazaqstanǵa 15,7 mln sheteldik azamat kelgen. Onyń 11,1 milliony týrister sanatyna jatqyzylǵan. Sheteldik qonaqtardyń el ishindegi shyǵyny 2,9 mlrd dollardy qurady.
Qytaidan keletin týrister sany da artqan. Bir jyl ishinde Qytaidan kelgender sany 46,8%-ǵa ósip, 960 myńnan asty.
Ishki týrizm boiynsha da ósim bar. 2025 jyly Qazaqstan ishinde saiahattaǵan azamattardyń sany 8,7 mln adamǵa jetip, bir jylda 10,7%-ǵa artqan.
Kýrorttarǵa jol jáne áýe qatynasy jaqsarady
Úkimet týristik nysandarǵa kólik qoljetimdiligin arttyrýǵa da kóńil bólip otyr. Qatonqaraǵai, Zaisan jáne Kendirlide jańa týristik áýejailar salynyp jatyr. Arqalyq áýejaiy qalpyna keltirilip, Balqash áýejaiy qaita jumysyn bastady.
Jazǵy maýsymda Alakól, Balqash, Túrkistan, Býrabai jáne Kaspii jaǵalaýyna aptasyna 45 sýbsidiialanatyn áýe reisi uiymdastyrylǵan. Sonymen qatar Alakólge qatynaityn 10 poiyzdy qosa alǵanda, 15 qosymsha temirjol baǵyty iske qosyldy.
Almaty taý klasterin damytý aiasynda 30 aspaly jol men 161 shaqyrym taý shańǵysy trassasyn salý josparlanǵan. Uzaq merzimdi maqsat – klasterge jylyna 5 mln týrist tartý.
Ulttyq parkterge kirý balalar úshin tegin
Ekotýrizmge de suranys artyp keledi. 2025 jyly ulttyq parkterge 3,7 mln adam barǵan. Qorǵalatyn tabiǵi aýmaqtarda 179 týristik marshrýt pen 42 ekosoqpaq jumys isteidi.
2026 jyldan bastap 18 jasqa deiingi balalarǵa ulttyq tabiǵi parkterge kirý tegin boldy.
Sonymen qatar týristerdi tartý úshin sheteldik týrister ákeletin týroperatorlarǵa sýbsidiia berý, balalardyń áýe biletterin sýbsidiialaý, jol boiyndaǵy servistik nysandar men sanitariialyq toraptardyń qurylysyn qoldaý siiaqty sharalar engizilip jatyr.
