Qazaqstan Premer-ministri Oljas Bektenov IX Kazakhstan Global Investment Roundtable (Jahandyq investitsiialar boiynsha qazaqstandyq dóńgelek ústel) is-sharasyna qatysty, dep habarlaidy ult.kz.
Biylǵy is-sharanyń Shymkent qalasynda ótýi Eýraziianyń negizgi saýda aǵyndary men Batys Eýropa – Batys Qytai halyqaralyq kólik dáliziniń toǵysynda ornalasqan megapolistiń qarqyndy damýyn kórsetedi.
Plenarlyq otyrys bastalar aldynda Oljas Bektenov sheteldik seriktestermen birlesip júzege asyrylyp jatqan óńdeý ónerkásibin, AÓK, energetika jáne basqa da salalardaǵy birqatar jobamen tanysty.
KGIR-2026 alańynna syndarly dialog ornatýdy maqsat etken 40-tan astam elden kelgen 500-den astam investor men biznes ókili jinaldy.
Premer-ministr jetekshi sheteldik kompaniialar jańa jobalary úshin Qazaqstandy tańdaýdy jalǵastyryp jatqanyn atap ótti. Tabysty júzege asyrylyp jatqan bastamalar osynyń aiqyn dáleli.
Plenarlyq sessiia barysynda Shymkent qalasynyń ákimi Ǵabit Syzdyqbekov, The Boeing Company prezidenti jáne bas atqarýshy direktory Kelli Ortberg, Islam damý bankiniń prezidenti, Islam damý banki tobynyń tóraǵasy Mýhammad Sýleiman Al-Djasser, Masdar bas atqarýshy direktory Mohamed Djamil Al-Ramahi, Sarens Kazakhstan prezidenti Lýdo Anton Sarens, Lasselsberger Group bas atqarýshy direktory Iozef Lasselsberger sóz sóiledi.
Shymkentte KGIR-2026 alańynda jalpy somasy $4,8 mlrd bolatyn 22 qujatqa qol qoiyldy.
Olardyń qatarynda kelesidei Investitsiialar týraly kelisimder:
Qostanai oblysynda $730 mln somasyna qýaty 1 000 MVt bolatyn, energiia jinaqtaý júiesi bar jel elektr stansasyn salý týraly (QR Energetika ministrligi men «Turan Wind Energy» JShS arasynda);
$249,6 mln somasyna Qazaqstannyń avtomobil joldarynda intellektýaldy baqylaý júiesin (AJIBJ) qurý týraly (QR Kólik ministrligi men «Freedom Lab» JShS arasynda);
Aqtóbe qalasynda $150 mln somasyna shyny ydys óndiretin zaýyt salý týraly (QR Ónerkásip jáne qurylys ministrligi men Aktobe Steklo kompaniiasy arasynda).
Memorandýmdar:
$1 mlrd somasyna 20 óńirlik inkliýzivti mektepten turatyn jeli salý jobasyn júzege asyrý týraly (QR Oqý-aǵartý ministrligi men «DSKZ & KAMC» JShS arasynda);
$1 mlrd somasyna Quryq portynyń damýynyń birinshi kezeńi aiasynda kópfýnktsionaldy terminal salý týraly («Báiterek» ulttyq investitsiialyq holdingi» AQ men Guoyou Materials Group Co., Ltd. arasynda);
$650 mln somasyna «Qazaqstannyń halyqaralyq meditsinalyq qalasy» investitsiialyq jobasyn júzege asyrý týraly («KAZAKH INVEST» UK» AQ men Shoval Kazakhstan Ltd. arasynda);
$500 mln somasyna DÓO alqabynyń aýmaǵynda qýaty 250 MVt bolatyn data-ortalyq salý týraly (QR Jasandy intellekt jáne tsifrlyq damý ministrligi men Amsa Digital kompaniiasy arasynda);
$111,1 mln somasyna et klasterin qurý týraly (Túrkistan oblysynyń ákimdigi men «Nurym Group» JShS arasynda);
Astanada $40,8 mln somasyna britandyq bilim berý modeli boiynsha jataqhanasy bar ýniversitet kampýsyn salý jáne paidalaný týraly (QR Ǵylym jáne joǵary bilim ministrligi men Coventry University Kazakhstan arasynda);
$8,8 mln somasyna polipropilen qaptar men big-begter óndiretin zaýyt salý týraly (Qyzylorda oblysynyń ákimdigi men Apex Packaging kompaniiasy arasynda) jáne basqa da qujattar bar.
Sondai-aq Shymkent qalasynyń ákimdigi men «KOKSAN» JShS arasynda $74,3 mln somasyna PET-preformalar óndiretin jáne plastikti qaita óńdeitin zaýyt salý jónindegi negizdemelik kelisimge qol qoiyldy.
