Ótken jyly Qasym-Jomart Toqaev sailaýaldy baǵdarlamasynda jariialanǵan tiimdi memlekettik basqarý bastamasyn júzege asyryp, 22 shildede Prezident Ákimshiligi janynan Ótinishterdi qaraýdy baqylaý bólimin qurdy. Bir jylda atalǵan bólim 30 myńnan astam turǵynnyń muń-muqtajyn tyńdap, máselesin sheshýge kómektesken.
El turǵyndary Prezident Ákimshiligine túrli másele boiynsha júginedi. Shaǵymdar men ótinishterden basqa, zańnamany jetildirý, áleýmettik-ekonomikalyq jobalar boiynsha bastamalar men jobalar da usynylady. Óz kezeginde Ótinishterdi qaraý bólimi shaǵymdar boiynsha tiisti memlekettik organǵa saýal joldap, máseleniń jedel sheshilýine yqpal etedi.
Máselen, «Qazaqstan fotoentsiklopediiasy» jobasynyń avtorlarynyń biri V.Pronin biregei jobany ári qarai damytý úshin Ótinishter bólimine júgingen. Prezident kómekshisiniń qabyladýynan keiin birneshe kúnde QR Aqparat jáne qoǵamdyq damý ministrligi «Qazaqstan fotoentsiklopediiasy» merzimdi jáne jelilik basylymyn esepke qoiǵany týraly kýálik berdi.
«Fotojobanyń ózi – Qazaqstan halqynyń mádenieti týraly sýretterdiń elektrondy banki ispettes. Munda sáýlet, tabiǵat, oqiǵalar, sport syndy kóptegen sala qamtylady. Materialdar 16 jyl boiy jinalǵan. Túrli tehnikalar men litsenziialyq baǵdarlamalar óz qarajatymyzǵa alyndy. Ári qarai da jumys isteý úshin tehnikany jańartý kerek boldy. Sol úshin Prezidentten kómek suradyq. Qoǵamdyq qabyldaýdan Aida Balaeva bizdiń hatymyzdy oqyp, jobamyzdy zertteýge tapsyrma berdi. Mádeniet ministrimen onlain konferentsiia jasaldy. Bizge BAQ retinde resmi tirkelýdi usyndy jáne barlyq qujat jyldam rásimdeldi. Bul Úkimettiń bizdiń jobany baǵalaýynyń arqasy. Alda taǵy josparymyz kóp», - dedi «Qazaqstan fotoentsiklopediiasy» jobasynyń avtory Vladimir Pronin.
Óńirlerde turatyn halyqtyń únine qulaq asyp, máselesin oń sheship bergen mysaldar kóp. Atap aitqanda, Qyzylorda oblysynda kásipker S. Muhamedievke aimaqtaǵy nitrit tuz ken ornynda óndiris ashý jobasy boiynsha kómek kórsetildi. Jobany júzege asyrý úshin oblys ákimdigi 5 gektar jer bólip, qajetti qujattardy ázirleý rásimderi bastaldy.
Sonymen birge, Ótinishter bólimi kásipkerlerdiń memlekettik organdar jumysyna degen barlyq aryz-shaǵymyna kóńil bólip otyr. Máselen, jaqynda Almaty qalasyndaǵy «Exxon corp.-10» JShS Ekonomikalyq tergeýler departamentiniń is-áreketine shaǵymdandy. Olar JShS-ǵa qatysty asa iri kólemdegi munai ónimderin shyqqan ornyn rastaityn qujattarsyz tasymaldaý, saqtaý faktisi boiynsha sotqa deiingi tergeý jumystaryn bastaǵan. Júrgizilgen sot-ekonomikalyq saraptama nátijesinde biylǵy 5 maýsymda Almaty qalasynyń prokýratýrasy qylmystyq quram bolmaǵandyqtan isti toqtatýdy uiǵardy. Al Ekonomikalyq tergeýler departamentiniń laýazymdy tulǵalaryna qatysty tártiptik shara qoldanyldy.
Prezident kómekshisi turǵyndar usynǵan barlyq strategiialyq bastamalardy da erekshe nazarǵa alady. Osylaisha, K.Konopianovtyń Qazaqstannyń soltústigindegi aýyl sharýashylyǵyn damytý boiynsha jańa strategiia jasaý týraly ótinishi QR Aýyl sharýashylyǵy ministrligine joldandy. Óz kezeginde ministrlik bólimi avtorǵa AÓK damytý memlekettik baǵdarlamasyn ázirleý jónindegi jumys tobyna kirýdi usyndy.
Qiyn jaǵdaida qalǵan azamattarǵa da Ótinishter bólimi qol ushyn sozady. Máselen, Galai K.N. esimdi azamat uzaq jyldar boiy Máskeýde turyp, Almatyǵa qaita oralǵan ájesi S. K. Qanaevany tirkeýge alýǵa kómek kórsetilgeni úshin alǵys aitty.
Kóptegen oqiǵalarda Ótinishter bólimine QR Quqyqtyq keńesshiler palatasy qaýymdastyǵy úlken kómek kórsetedi. Zań keńesshileriniń saraptamalyq tujyrymdamalary eń qiyn jaǵdailardy da anyqtaýǵa kómektesedi. Týǵan uly T. Erlanovqa qatysty sot aktilerimen kelispegen A. B. Qusaiynovanyń ótinishi egjei-tegjeili zerttelgen soń, Bas Prokýror sot sheshimine narazylyq bildirdi. Joǵarǵy Sot úkimdi qanaǵattandyryp, sottalýshynyń áreketi qaita qaraldy jáne qamaýdan bosatyldy.
Ótinish berýshilerdiń máselelerin tiimdi sheshý úshin Prezidenttiń kómekshisi tiisti memlekettik organdardyń qatysýymen jeke qabyldaý ótkizedi. Azamattyq-quqyqtyq daý-damai men jer ýchaskesi bar turǵyn úidi satyp alý-satý shartyn jalǵan dep tanýdy talap etý boiynsha, B.J. Tájenovanyń ótinishimen Joǵarǵy sot ókilderiniń qatysýymen ótken jeke qabyldaý ótti. Nátijesinde Atyraý oblystyq sotynyń Azamattyq ister jónindegi alqasynyń qaýlysymen talap aryzdy qanaǵattandyrýdan bas tartý týraly sheshim joiyldy, is boiynsha talap aryzdy qanaǵattandyrý týraly jańa sheshim qabyldandy, satyp alý-satý sharty jaramsyz dep tanylyp, jer ýchaskesi bar úi ótinish berýshige qaitaryldy.
Al qaraǵandylyq S. V. Iakovleva qaladaǵy kólik-tehnikalyq kolledjin jańa orynǵa kóshirý máselesimen júgingen edi. Ótinish berýshi kolledj qalanyń basqa aýdanyna kóshken soń, kólik logistikasyndaǵy qiyndyqtarǵa bailanysty stýdentterge jańa jerge jetý qiynǵa soǵady dep shaǵymdandy. Bul máseleni Qaraǵandy oblysynyń bilim berý basqarmasy baqylaýǵa alǵan soń, kólik-tehnikalyq kolledjdi kóshirý jumystary toqtatyldy.
Sonymen birge, astanalyq turǵyn M. D. Ámirbekova «Kúmis alqa» iegeri retinde kommýnaldyq turǵyn úi qorynan baspana alýǵa, materialdyq kómek jáne jumys tabýǵa kómek surady jáne Ataýly áleýmettik kómekti ýaqytyly almaitynyna shaǵymdandy. Memlekettik baǵdarlama aiasynda 2019 jyldyń 21 tamyzynda ol Nur-Sultan qalasy, Qoshqarbaev dańǵylyndaǵy 80/1-úiden «Kópbalaly otbasy» sanatyndaǵy úsh bólmeli páterdi (77,3 sh.m.) aldy. Sáýirden bastap kóp balaly ana ai saiyn 117 607 teńge AÁK alyp otyr.
Taǵy bir turǵyn P.I. Niiazova Ótinishter bólimine júginip, «Berekeli Baspana» baǵdarlamasy boiynsha páter kiltin alýǵa kómek surady. Memlekettik baǵdarlama aiasynda onyń otbasy 2019 jyldyń 21 tamyzynda Nur-Sultan qalasy, Qoshqarbaev dańǵylyndaǵy 80/1-úiden «Kópbalaly otbasy» sanatyndaǵy eki bólmeli páterdi aldy.
Ekibastuz qalasynyń turǵyny M.Asylbaeva óziniń múgedek balalaryna tegin gliýtensiz ónim berilmegeni úshin shaǵym túsirdi. Nátijesinde Pavlodar oblysynyń Densaýlyq saqtaý basqarmasy emdik tamaq satyp alyp, gliýtensiz ónimderdi jetkizýge kelisimshart jasady. Tótenshe jaǵdai kezinde bul otbasyǵa kommýnaldyq qyzmetterdi tóleýge jáne azyq-túlik jiyntyqtaryn satyp alýǵa qarjylai kómek kórsetildi.
Aita keteiik, QR Prezidenti Ákimshiliginiń Ótinishterdi qaraýdy baqylaý bóliminiń meńgerýshisi, Prezident kómekshisi Tamara Dúisenova karantindik shekteý sharalaryna bailanysty shaǵymdanýshy azamattarmen jáne tiisti memlekettik organ ókilderimen onlain qabyldaý ótkizip keledi.
