Tabiǵi sipattaǵy tótenshe jaǵdailar saldarynan zardap shekkenderge keltirilgen ziiandy (zalaldy) óteý qaǵidalary jariialandy, dep habarlaidy QR Úkimetiniń baspasóz qyzmeti.
Qazaqstan Respýblikasy Úkimetiniń 2014 jylǵy 19 jeltoqsandaǵy №1358 qaýlysyna sai tótenshe jaǵdailar saldarynan zardap shekkenderge keltirilgen zalaldy óteý algoritmi bylai:
1. Materialdyq zalal keltirilgen zardap shegýshiler TJ týyndaǵan kúnnen bastap kúntizbelik 30 kún ishinde jergilikti atqarýshy organǵa (ákimdik) materialdyq zalaldy óteý týraly ótinish beredi.
Jábirlenýshiniń óziniń ótinish jazýǵa múmkindigi bolmaǵan jaǵdaida, onyń týystary nemese senimhat negizinde ózge de adamdar, sondai-aq eger jábirlenýshi kámelettik jasqa tolmaǵan bolsa, zańdy ókilderi keltirilgen ziiandy (zalaldy) óteý týraly ótinishpen júgine alady.
Keltirilgen zalaldy óteý týraly ótinishke: zardap shegýshi adamnyń jeke basyn kýálandyratyn qujattyń kóshirmesi; tabiǵi sipattaǵy TJ týyndaǵan sátten bastap nemese TJ joiý kezeńinde zardap shekken adamnyń joǵalǵan jáne/nemese búlingen múlkiniń tizbesi qosa beriledi.
2. Ótinishter men qujattardy tirkeýdi ákimdik zardap shegýshige qujattardyń qabyldanǵanyn rastaityn qolhat bere otyryp, materialdyq zalaldy óteý týraly ótinishterdi tirkeý jýrnalynda júrgizedi.
3. Materialdyq zalaldy óteý týraly ótinish ákimdikke qujattar kelip túsken kúnnen bastap 15 jumys kúni ishinde qaralady.
4. Ákimdik ótinish tirkelgen kúnnen bastap 10 jumys kúni ishinde baǵalaýshyny tarta otyryp, keltirilgen zalaldyń mólsherin baǵalaýdy (ótinish berýshiniń múlkine qoljetimdilik bolýǵa tiis) uiymdastyrady.
Jábirlenýshi baǵalaý júrgiziletin ýaqyt pen oryndy anyqtaidy, keiin jábirlenýshi baǵalaý týraly eseppen tanysýǵa tiis.
5. Ákimdik baǵalaýshy qorytyndy shyǵarǵannan keiin 3 jumys kúni ishinde oblystyń, respýblikalyq mańyzy bar qalanyń, astananyń, aýdannyń jáne oblystyq mańyzy bar qalanyń biýdjetin atqarý jónindegi ýákiletti organmen kelisilgen qarajat bólý týraly sheshim qabyldaidy.
6. Zardap shekkenderge tólem tiisti sheshim qabyldanǵannan keiin kúntizbelik 30 kún ishinde júzege asyrylady.
Múlikti tolyqqandy ári sapaly baǵalaý úshin sarapshylardyń jumysy sý tasqyny jaǵdaiy turaqtalyp, úiler men aýla aýmaqtarynan sý tolyǵymen tartylǵannan keiin bastalady.
