Jańadan kásip bastaýshylarǵa jeńildetilgen nesie eldegi Tótenshe jaǵdai rejiminen keiin de beriledi. Bul týraly «Damý» kásipkerlikti damytý qory» AQ memlekettik organdar men ózara áreket etý departamentiniń direktory Gúlsaia Zainelǵabdina aitty, dep habarlaidy QazAqparat.
«Bizde jańa kásip bastaýshylarǵa arnalǵan baǵdarlamalar burynnan bar. Olar Tótenshe jaǵdai aiasynda da jalǵasyn taba beredi. Jańa kásip bastaimyn deýshiler «Eńbek» baǵdarlamasy arqyly óz isin bastai alady. Ol arqyly kásipkerlerge 6 paiyzdyq mólsherlememen nesie alýyna múmkindik bar. Bul rette qaryz mólsheri – 6000 AEK-ten 8 000 AEK-ke deiin bolýy múmkin. Qaryz merzimi – 5 jyl. Odan bólek «Biznestiń jol kartasy – 2025» baǵdarlamasy da baryn bilesizder. Onyń aiasynda da jańadan kásip bastaýǵa nietti azamattardy qoldaimyz. Olarǵa sýbsidiialaý, kepildendirý quraldaryn usynamyz. Bul rette jańadan kásip bastaǵan kásipkerler jumysyn aýyldarda nemese monoqalalarda bastasa – 750 mln teńgege deiin qaryz ala alady. Odan bólek olarda ainalym qarajat retinde 360 mln teńgege deiin nesie alýyna múmkindik bar», - dedi Gúlsaia Zainelǵabdina OKQ-da onlain rejimde ótken baspasóz máslihatynda.
«Damý» qorynyń ókili kásipkerlerge kepildik quraly usynylatynyn da jetkizdi. Iaǵni jańadan kásibin bastaǵan azamattar úshin kepildik mólsheri qaryz somasy 180 mln teńgeden aspaǵan jaǵdaida 85 paiyzdyq deńgeide bolatynyn jetkizdi.
«Al kásipker qalada jobasyn júzege asyryp jatsa, kepildik mólsheri 7 mlrd teńgege deiin ulǵaiyp otyr. Stavka – túpki qaryz alýshy úshin 6 paiyz. Qazir de «Damý» qoryna ótinim joldai alasyzdar. Ótinimder Tótenshe jaǵdai kezinde de, keiin de qaralady», - dedi ol.
Aita ketsek, buǵan deiin QR UEM kásipkerlikti damytý departamentiniń direktory Shyńǵys Ahmetov «Biznestiń jol kartasy – 2025» baǵdarlamasy men «Qarapaiym zattar ekonomikasy» baǵdarlamasy biznes ielerine memleket qandai qoldaý sharalaryn kórsetetinin aityp bergen edi.
