Koronavirýs infektsiiasynyń taralýyn boldyrmaý jáne oqshaýlaý sharalaryn kúsheitý maqsatynda elimizdegi Halyqqa qyzmet kórsetý ortalyqtarynyń jumysy ýaqytsha toqtady. Mundai tapsyrmany Memleket basshysy Qasym-Jomart Toqaev bergen bolatyn, dep habarlaidy "Ult aqparat".
Búgingi tańda qazaqstandyqtarǵa memlekettik qyzmetterdiń 80% «elektrondyq úkimet» portaly arqyly qoljetimdi, sondai-aq qajetti anyqtamalardy eGov Mobile mobildik qosymshasy jáne Telegram-daǵy egovkzbot2.0 boty arqyly alýǵa bolady.
HQO-nyń tájiribeli jáne arnaiy oqýdan ótken 1800-den astam qyzmetkeri, sonyń ishinde Almaty filialynyń 50 qyzmetkeri «1414» bailanys ortalyǵynyń keńes berýshilerimen birge azamattarǵa memlekettik qyzmetterdi onlain túrde alý boiynsha kómek kórsetetin bolady.
Bir ýaqytta bailanys ortalyǵynyń mamandary myńnan astam azamatqa keńes bere alady dep josparlanýda. Bailanys ortalyqtary dúisenbiden senbige deiin tańǵy 9.00-den keshki 20.00-ge deiin jumys isteidi. Qońyraý shalý tegin.
Budan bólek, «Azamattarǵa arnalǵan úkimettiń» 200-den astam qyzmetkeri, onyń ishinde Almaty qalasy filialynyń 30 mamany beineqońyraý arqyly qyzmet alýshylardy mobildik azamattar bazasynda tirkeitin bolady.
Sonymen qatar, Almaty filialynyń 50 mamany qashyqtan jumys istep, azamattarǵa uialy telefon arqyly onlain qyzmet alýǵa kómektesedi. Bul rette, 21 naýryzǵa deiin ótinish berip úlgergen azamattar qyzmetterdiń daiyn nátijesin ózi ótinish bergen HQO-nyń qujat berý sektorynan alyp kete alady.
Kólikti qaita tirkegen nemese júrgizýshi kýáligin onlain túrde aýystyrǵan avtokólik ieleri daiyn qujattar men nómirlerdi óz qalalaryndaǵy mamandandyrylǵan HQO-dan ala alady, daiyn qujattardy berý terezesi jumys isteidi.
Daiyn qujattardy berý terezeleriniń jumys tártibi: dúisenbi-juma 9.00-den 17.00-ge deiin, senbi saǵat 9.00-den 14.00-ge deiin.
«Azamattarǵa arnalǵan úkimet» qazaqstandyqtarǵa barlyq sanitarlyq talaptardy oryndap, úiden shyqpaýǵa keńes beredi jáne kerekti memlekettik qyzmetterdi onlain alýǵa shaqyrady.
