Aqtóbe oblystyq qylmystyq ister jónindegi mamandandyrylǵan aýdanaralyq sotynda «tórt aǵaiyndy» isi qaralýda. Búgin sotqa qatysqan Olimpiada chempiony Iýrii Melnichenko aiyptalýshy Erkin Izbasar týraly aityp berdi, dep habarlaidy QazAqparat tilshisi.
«Erkin Izbasardy Keńes odaǵynan beri tanimyn. Men grek-rim kúresinen Keńes odaǵynyń quramynda boldym. Sol kezde komandaǵa Esengeldi Batyrǵarin engen bolatyn. Ol Aqtóbe oblysy, Shalqar aýdanynyń týmasy. Jarystarǵa qatysyp júrgende Erkin Izbasarmen kezdestim. Esengeldi Erkinmen dos boldy. Erkin Izbasar jattyǵý zalyna kelip, jankúier, sport janashyry retinde tanyldy. Keiin jarystarda jolymyz túiisti. Gýanchjoý qalasynda ótken Aziia oiyndarynda boldyq. Bul 8-10 jyl buryn bolǵan jaǵdai", - dedi Iu. Melnichenko. Ol sondai-aq, Erkin Izbasar men Aýhat Qalievti jaqsy jaǵynan ǵana aita alatynyn jetkizdi. "Keńes odaǵy qulaǵan kezde Aqtóbe oblysynda sport quldyrap ketti. Janashyr adamdardyń qoldaýy kerek boldy. Sol qoldaýdy Erkin Izbasar jasap, balýandardy kóterdi. 2015 jyldan bastap aqtóbelik balýandar Qazaqstan quramasyna endi. Onyń ishinde Aziia chempiony Nurislam Sanaev ta bar», - dedi Olimpiada chempiony Iýrii Melnichenko.
Keiin Iýrii Melnichenko sottalýshy Erkin Izbasar tek Qazaqstan emes, Resei Federatsiiasynyń sportshylary arasynda da keń tanylǵanyn jasyrmady. Al sýdia Ahmetqali Moldaǵaliev sportshylarǵa qoldaý bildirip júrgen Erkin Izbasardyń qarjyny qaidan alatynyn surady.
«Men ony bilmeimin. Kásipkerlikpen ainalyspaimyn, biz jarystarda kezdesip turamyz. Odan suraǵan da emespin. Metsenat bolyp júrgen jalǵyz ol emes. Elimizde sportty qoldap, investitsiia salyp júrgen adam kóp», - dedi Iýrii Melnichenko.
Aita keteiik, Erkin Izbasar týraly sot otyrysyna qatysyp, ony qoldaýǵa Daǵystannan sportshy Timýr Gadisev ta kelgen.
«Erkin Izbasar Qazaqstan sportyn damytyp júrgen adam. Ol árdaiym sportshylardyń janynda bolýǵa daiyn. Sportshylardy jattyǵýǵa jiberip, únemi shyńdap otyratyn. Men ol týraly aitý úshin Qazaqstanǵa kelip otyrmyn. Qajet bolsa Afrika, AQSh-qa jaiaý, velosipedpen bolsa da barar edim», - dedi Timýr Gadisev.
Eske salsaq, Aqtóbe oblystyq qylmystyq ister jónindegi mamandandyrylǵan aýdanaralyq sotynda Erkin Izbasar, Aýhat Qaliev bastaǵan qylmystyq topqa qatysty is qaralyp jatyr. Olarǵa munai urlyǵy, zańsyz saqtady, satty jáne reiderlik jolmen bótenniń múlkin tartyp aldy dep aiyp taǵylǵan. Barlyǵy 26 sottalýshyǵa qatysty qylmystyq istiń qaralyp jatqanyna 4 ai boldy.
