Pavlodardaǵy kontsertte dórekilik kórsetip, basy daýǵa qalǵan ánshi Tóreǵali Tóreáli Almaty shaharynda ótken respýblikalyq aqyndar aitysynda halyqtan keshirim surady, dep habarlaidy "Ult aqparat".
Jelide ánshiniń kórermender aldynda keshirim suraǵan sáti túsirilgen video tarady. Tóreǵali aitysqa jinalǵan halyqtan "Menen basqa ne jańalyq bolyp jatyr?" dep surap, jurtty kúldirdi. Al qonaqtar estrada juldyzyn dý qol shapalaqpen qarsy aldy.
Ánshi kontsertte shyqqan shý oǵan sabaq bolǵanyn jasyrmady.
"Synap ta, sybap ta alyp jatyrsyzdar. Ol men úshin jigerlendirý boldy. Sizderdei qorǵaityn el-jurt barda, qoldaityn Alla barda meniń eńsemdi tiktep ustap júrmeýge eshqandai qaqym joq dep oilaimyn, aǵaiyn. Qazaqta bir jaqsy sóz bar ǵoi: "Týǵan jeriniń tasyna súringen er-jigittiń aiaǵy aqsamaidy" degen. Bunyń bári men úshin úlken sabaq boldy. Bulttan biik bolsam da, ulttan biik emespin, aǵaiyn. Kem-ketigim bolsa erkeligim dep, shalalyǵym bolsa balalyǵym dep qabyldarsyzdar", — dedi Tóreáli.
Jas ánshi jasaǵan qateligi úshin keshirim surady.
"Keshirim suraimyn. Sizderdi qatty jaqsy kóremin. Ony men sózimmen rastap, eshqandai aqtalmai-aq, júrekterińiz sezer dep oilaimyn", — degen ol "Aqiqat" atty jańa týyndysyn oryndap berdi.
Esterińizge salyp ótsek, Tóreǵali Tóreáli tóńiregindegi daý jeltoqsan aiynyń sońynda shyqqan bolatyn. Ánshi Pavlodarda ótken kontsertinde zaldaǵy kórermenge dóreki sóilep, keiin ony qýyp shyqty. Estrada juldyzynyń sahnadaǵy ersi qylyǵy áleýmettik jelilerde shý bolyp, qoǵamdyq rezonans týdyrǵan edi.
