Keshe, 28 shildede Toqtar Áýbákirov 80 jas merei toiyn atap ótti, dep habarlaidy ult.kz.
Toidan úzindilerdi ánshi Zarina Omarova áleýmettik jelige júktedi.
«El tarihynda esimi altyn árippen jazylǵan tulǵa - Toqtar Áýbákirov aǵamyz.
80 jas merei toiyńyz qutty bolsyn!
Ańyz aǵamyzdyń ǵumyry uzaq bolsyn dep, quttyqtap qoiyńyzdar!», - dep jazdy ánshi.
Aita keteiik, Toqtar Ońǵarbaiuly Áýbákirov – qazaq halqynyń tuńǵysh ǵaryshkeri, synaqshy-ushqysh, aviatsiia general-maiory, Keńes Odaǵynyń Batyry jáne Qazaqstannyń Halyq Qaharmany. Ol 1946 jyldyń 27 shildesinde Qaraǵandy oblysy Qarqaraly aýdanyndaǵy Birinshi Mai aýylynda (qazirgi Toqtar aýyly) dúniege kelgen. Balalyq shaǵynan-aq aspan álemine qyzyǵyp, ushqysh bolýdy armandaǵan. Eńbek jolyn Temirtaýda tokar bolyp bastap, keiin Armavir joǵary áskeri aviatsiia ýchilishesin támamdap, áskeri ushqysh atandy.
Toqtar Áýbákirov aviatsiia salasynda erekshe sheberligimen kózge túsip, ondaǵan jańa áskeri ushaqtardy synaqtan ótkizdi. Onyń batyldyǵy men kásibi biliktiligi úshin 1988 jyly Keńes Odaǵynyń Batyry ataǵy berildi. Keiin aviatsiia general-maiory dárejesine deiin kóterildi.
1991 jyldyń 2 qazanynda Toqtar Áýbákirov Baiqońyr ǵarysh ailaǵynan «Soiýz TM-13» ǵarysh kemesimen ǵaryshqa ushty. Ol «Mir» orbitalyq stantsiiasynda segiz kúnge jýyq ýaqyt bolyp, «Ǵarysh–Qazaqstan» baǵdarlamasy aiasynda birneshe ǵylymi tájiribe júrgizdi. Ǵaryshta Aral teńiziniń ekologiialyq jaǵdaiyn baqylaý, meditsinalyq-biologiialyq zertteýler men basqa da ǵylymi jumystar atqaryldy. Ekspeditsiia 1991 jyldyń 10 qazanynda sátti aiaqtaldy. Osylaisha Toqtar Áýbákirov qazaqtan shyqqan tuńǵysh, álemniń 256-shy jáne KSRO-nyń 72-shi ǵaryshkeri retinde tarihqa endi.
Qazaqstan táýelsizdik alǵannan keiin Toqtar Áýbákirov eldiń ǵarysh salasynyń damýyna, ǵylym men jastar tárbiesine úles qosty. 1995 jyly oǵan Qazaqstan Respýblikasynyń eń joǵary marapattarynyń biri – «Halyq Qaharmany» ataǵy berildi. Sonymen qatar ol tehnika ǵylymdarynyń doktory, professor atandy.
