Qazaqstan Prezidenti Qazaqstan Halyq Keńesiniń birinshi sessiiasynda sóilegen sózinde jazýshylardy qala taqyrybyna arnalǵan shyǵarmalardy kóbeitýge shaqyrdy, dep habarlaidy ult.kz.
Memleket basshysy qazirgi zamanda ýrbanizatsiia úderisi qarqyn alyp jatqanyn atap ótti. Onyń aitýynsha, Qazaqstanda aýyl taqyryby keńinen qozǵalǵanymen, qala órkenietin dáripteýge de mán berý qajet.
«Biz aýyl týraly kóp aitamyz. «Aýyl – halqymyzdyń altyn besigi» dep árbir jiynda aityp júremiz. Rasynda, bul – durys. Biraq qazirgi zamanda bul sózdi qaita-qaita aita berýdiń qajeti bar ma?», – dedi Prezident.
Qasym-Jomart Toqaev qalada turatyn jastardy «asfalt qazaǵy» nemese «shala qazaq» dep aýyl jastaryna qarsy qoiý durys emes ekenin aitty.
«Birtutas halqymyzdy ekige bólýdi doǵarýymyz kerek. Mundai áreketti jasaýdyń eshqandai qajeti de, oǵan eshkimniń haqy da joq», – dedi ol.
Prezident qazirgi tańda qalada turatyn jastardyń arasynda qazaq mektepterinde bilim alyp, qazaq tilin meńgerip jatqan azamattar kóp ekenin atap ótti.
Osyǵan bailanysty Memleket basshysy Mádeniet jáne aqparat ministrligine jazýshylar arasynda qala taqyrybyna arnalǵan ádebi baiqaýlar ótkizýdi tapsyrǵanyn aitty.
«Bul halqymyzǵa, ásirese, jastarymyzǵa kerek dúnie bolmaq», – dedi Prezident.
