Qazaqstan Prezidenti Qasym-Jomart Toqaev Germaniiaǵa sapary kezinde BAQ ókilderine bergen suhbatynda Ýkrainadaǵy áskeri is-qimyldy ýaqytsha doǵarý týraly buǵan deiin aitqan sóziniń mánin túsindirdi, dep habarlaidy ult.kz.
ARD telearnasynyń tilshisi Demian fon Osten Memleket basshysynan Omby qalasynda aitqan málimdemesine qatysty pikir bildirip, Reseidegi qazirgi ahýalǵa baǵa berýdi surady.
Prezident Vladimir Pýtindi Resei basshysy ári memleket qairatkeri retinde Ortalyq Aziia, Eýropa, sonyń ishinde Qazaqstan jáne jalpy álem úshin mańyzdy saiasi tulǵa dep baǵalaitynyn aitty.
«Men ony óte jaqsy bilemin. Onyń boiynan tarihy qym-qiǵash alyp eldiń basshysyna tán qasietterdiń bári tabylady. El aldynda turǵan kúrdeli strategiialyq maqsattardy ózinshe túsinedi», – dedi Qasym-Jomart Toqaev.
Sonymen qatar Prezident Ýkrainadaǵy jaǵdai Qazaqstandy da alańdatatynyn atap ótti.
«Men áýel bastan Qazaqstan Birikken Ulttar Uiymy Jarǵysynyń erejelerin qatań ustanatynyn aitqanmyn. Biz barlyq memlekettiń aýmaqtyq tutastyǵy qaǵidatyn saqtaýǵa jáne qurmetteýge úndep kelemiz», – dedi ol.
Toqaev Qazaqstannyń Ýkraina halqyna, onyń tarihy, mádenieti, dástúri men tiline qurmetpen qaraitynyn aitty.
Prezident soǵysty «dereý toqtatýdy» usynbaǵanyn naqtylady. Onyń aitýynsha, qazirgi jaǵdaida munyń ońai emes ekenin túsinedi.
«Meniń meńzegenim: Ýkraina aýmaǵyndaǵy áskeri is-qimyldy ýaqytsha doǵaryp, diplomatiialyq protseske kóshý nemese qandai da bir kelissóz bastaý edi», – dedi Memleket basshysy.
