Memleket basshysy Qasym-Jomart Toqaev Túrki memleketteri uiymyna múshe elderdiń joǵarǵy sottarynyń ekinshi konferentsiiasyna qatysý úshin Qazaqstanǵa kelgen sot júiesiniń joǵary laýazymdy ókilderimen kezdesti, dep habarlaidy ult.kz.
Prezident Ázerbaijan Joǵarǵy sotynyń tóraǵasy Inam Kerimovti, Qyrǵyzstan Joǵarǵy sotynyń tóraǵasy Mederbek Satyevti, Túrkiianyń Kassatsiialyq sotynyń tóraǵasy Omer Kerkezdi, Túrkiia Memlekettik keńesiniń tóraǵasy Zeki Iigitti jáne Ózbekstan Joǵarǵy soty tóraǵasynyń birinshi orynbasary Alisher Ýsmanovti qabyldady.
Kezdesý barysynda Qasym-Jomart Toqaev baýyrlas memleketter arasyndaǵy yntymaqtastyqty nyǵaitýda Túrki memleketteri uiymynyń mańyzy zor ekenin atap ótti.
«Árbir órkenietti eldiń ósip-órkendeýi úshin sot júiesiniń mańyzy zor. Sondyqtan joǵarǵy sottar arasyndaǵy ózara tyǵyz bailanysty tereńdetý baýyrlas elderimizdiń ortaq múddesine tolyq sai keledi», – dedi Memleket basshysy.
Prezidenttiń aitýynsha, Túrkistanda ótetin konferentsiia aiasynda sot júiesin tsifrlandyrý, investorlardyń quqyqtaryn qorǵaý jáne ózge de mańyzdy máseleler talqylanady. Onyń pikirinshe, mundai ózekti taqyryptar boiynsha tájiribe almasý uiymnyń damýyna jáne halyqaralyq bedeliniń artýyna yqpal etedi.
Kezdesý barysynda Qasym-Jomart Toqaev qonaqtarǵa Qazaqstanda júzege asyrylyp jatqan aýqymdy saiasi jáne quqyqtyq reformalar týraly da málimet berdi.
Memleket basshysy 1 shildeden bastap elimizdiń jańa Konstitýtsiiasy kúshine enetinin atap ótip, onda egemendikti, táýelsizdik pen aýmaqtyq tutastyqty qorǵaý, azamattardyń quqyqtary men bostandyqtaryn qamtamasyz etý, zań ústemdigin nyǵaitý siiaqty negizgi qaǵidattar bekitilgenin aitty.
Sonymen qatar jańa Ata zańda adam kapitalyn, ǵylym men bilimdi, innovatsiiany damytý strategiialyq basymdyq retinde aiqyndalyp, azamattardyń derbes derekterin, onyń ishinde tsifrlyq keńistiktegi jeke málimetterin qorǵaý týraly norma alǵash ret engizilgen.
Prezidenttiń sózinshe, Konstitýtsiialyq reformalardy iske asyrý maqsatynda bes konstitýtsiialyq zańǵa qol qoiylyp, 70-ten astam kodeks pen zańǵa ózgerister engizilgen.
Kezdesý sońynda Memleket basshysy Qazaqstannyń Túrki memleketteri uiymy aiasyndaǵy barlyq bastamalardy qoldaitynyn atap ótip, sot jáne quqyq qorǵaý salalaryndaǵy ózara yntymaqtastyqty odan ári damytýǵa daiyn ekenin jetkizdi.
