Memleket basshysy Qasym-Jomart Toqaev telekópir arqyly «Qyzylorda – Sekseýil», «Ulǵaisyn – Sekseýil» jáne «Beineý – Sekseýil» avtojoldarynyń qurylysyn resmi túrde bastady, dep habarlaidy ult.kz.
Prezident kólik-logistika salasy Qazaqstannyń ekonomikalyq ósimi men tranzittik áleýetin arttyratyn negizgi baǵyttardyń biri ekenin atap ótti. Onyń aitýynsha, eldiń basty maqsaty – Qazaqstandy Eýropa men Aziiany jalǵaityn jetekshi logistikalyq habqa ainaldyrý.
Memleket basshysy sońǵy jyldary kólik infraqurylymyn damytý baǵytynda aýqymdy jumystar atqarylyp jatqanyn aitty. Byltyr «Dostyq – Moiynty» temirjolynyń ekinshi jelisi iske qosylyp, júk tasymaly bes esege artqan. Sonymen qatar Almatyny ainalyp ótetin temirjol jelisi paidalanýǵa berilip, júk jetkizý merzimi qysqarǵan.
Prezidenttiń málimetinshe, ótken jyly Qazaqstanda 13 myń shaqyrym avtojol salynyp, jóndelse, onyń 6 myń shaqyrymy paidalanýǵa berilgen. Al kelesi jyly elimizdegi avtokólik ótkizý beketteri tolyq jańǵyrtylady.
Qasym-Jomart Toqaev ásirese uzyndyǵy 800 shaqyrym bolatyn «Beineý – Sekseýil» jańa jolynyń mańyzyn erekshe atap ótti. Onyń aitýynsha, bul baǵyt Qytai shekarasyn Aqtaý jáne Quryq porttarymen tikelei bailanystyryp, Qytai men Eýropa arasyndaǵy júk tasymalynyń jolyn shamamen 1 myń shaqyrymǵa, al jetkizý ýaqytyn úsh táýlikke deiin qysqartady. Prezident osyǵan bailanysty jańa dálizdi «Aral–Kaspii magistrali» dep ataýdy usyndy.
Sondai-aq jalpy uzyndyǵy 774 shaqyrym bolatyn «Qyzylorda – Sekseýil» jáne «Ulǵaisyn – Sekseýil» baǵyttary keńeitilip, tolyq jańǵyrtylady. Jobalardy otandyq kompaniialar júzege asyrady. Qurylys jumystaryna 10 myńnan astam adam tartylady. Joldar paidalanýǵa berilgennen keiin júk tasymalynyń kólemi 2,5 ese ósip, jylyna 13,2 million tonnaǵa jetedi dep kútilýde.
Prezident barlyq qurylys jumystaryn 2029 jyldan keshiktirmei aiaqtaýdy tapsyrdy. Onyń aitýynsha, bul jobalar el ekonomikasynyń damýyna, týrizmniń órkendeýine jáne Qazaqstannyń halyqaralyq tranzittik áleýetiniń artýyna eleýli úles qosady.
