Memleket basshysy Qasym-Jomart Toqaev Qarjy naryǵyn retteý jáne damytý agenttiginiń tóraǵasy Mádina Ábilqasymovany qabyldady. Kezdesýde qarjy naryǵyn retteý men damytýdyń biylǵy segiz aidaǵy nátijeleri jáne aldaǵy kezeńge arnalǵan mindetter talqylandy, dep habarlaidy ult.kz.
Mádina Ábilqasymova jańa bank zańyn iske asyrý aiasynda zańǵa táýeldi aktiler bazasy tolyq jańartylǵanyn aitty. Osy baǵytta 80 normativtik-quqyqtyq akt qabyldanǵan.
Jyl basynan beri bankterdiń aktivteri 75,6 trln teńgege jetip, 6,9 paiyzǵa ósken. Al bank kapitalynyń jetkiliktilik deńgeii 20,7 paiyzdy qurady.
Agenttik segiz ai ishinde qarjy sektory sýbektilerine 279 inspektorlyq tekserý júrgizgen. Nátijesinde 190 qadaǵalaý sharasy qoldanylyp, jalpy somasy 465 mln teńge aiyppul salynǵan.
Mikroqarjy jáne kollektorlyq qyzmet naryǵynda jumys isteitin 13 sýbekt litsenziiasynan aiyryldy. Taǵy alty uiymnyń litsenziiasy ýaqytsha toqtatylyp, tórt kollektorlyq agenttik tiisti tizilimnen shyǵarylǵan.
Tutynýshylyq nesie ósimi baiaýlaǵan
Kezdesýde halyqtyń shamadan tys kredit alýyn azaitý jáne ekonomikany qarjylandyrýdy keńeitý sharalary da qaraldy.
Bizneske berilgen kredit kólemi 3,5 paiyzǵa ósip, 16 trln teńgege jetken. Al jyl basynan beri kásipkerlikke jańadan berilgen kredit kólemi 19,1 paiyzǵa artyp, 12,5 trln teńgeni qurady.
Qabyldanǵan retteý sharalarynyń nátijesinde jeti aida tutynýshylyq nesielerdiń ósimi 4,6 paiyzǵa deiin baiaýlaǵan.
Biyl shildeden bastap merzimi ótken bereshekti ujymdyq retteýge arnalǵan Finkelisimkz platformasy iske qosyldy. Al jyl sońyna deiin azamattardyń qarjy uiymdaryna qatysty ótinishteri men shaǵymdaryn qarastyratyn Biryńǵai qarjy ombýdsmeni keńsesi jumysyn bastaidy.
Sonymen qatar Agenttik Kapital naryǵy men saqtandyrý naryǵyn damytýdyń 2030 jylǵa deiingi baǵdarlamasyn jáne «Kapital naryǵy týraly», «Saqtandyrý naryǵy týraly» jańa zań jobalaryn ázirleý jónindegi jumystardyń barysyn baiandady.
Qarjy naryǵyna jasandy intellekt engiziledi
Kezdesýde qarjy sektoryn tsifrlandyrý máselesi de talqylandy.
Agenttik jasandy intellekt tehnologiialaryna negizdelgen FinAI biryńǵai qadaǵalaý platformasyn ázirlegen. Jyl sońyna deiin qarjy naryǵyna jasandy intellektini engizý strategiiasyn daiyndaý josparlanyp otyr. Qujatta aqparattyq qaýipsizdik pen derekterdi qorǵaýdyń biryńǵai tásilderi qarastyrylmaq.
Kezdesý qorytyndysy boiynsha Qasym-Jomart Toqaev qarjylyq turaqtylyqty qamtamasyz etý, qarjy salasynda jasandy intellektini keńinen paidalaný, ekonomikanyń naqty sektorlaryn kreditteýdi arttyrý, sondai-aq kapital jáne saqtandyrý naryqtaryn odan ári damytý jóninde birqatar tapsyrma berdi.
