Qazaqstan prezidenti Qasym-Jomart Toqaev memlekettik nagradalar men qurmetti ataqtar tizimin jańartatyn zańǵa qol qoidy. Qujatta ǵylym, bilim, mádeniet, óner jáne basqa da salalardaǵy jetistikteri úshin azamattardy marapattaý tártibi naqtylandy, dep habarlaidy ult.kz.
Zańǵa 2026 jylǵy 11 qarashada qol qoiylyp, sol kúni kúshine endi.
Qazaqstanda qandai jańa ordender paida boldy?
Jańartylǵan memlekettik nagradalar tizimine tarihi tulǵalardyń esimi berilgen jańa ordender engizildi.
«Al-Farabi» ordeni – bilim, ǵylym, mádeniet jáne rýhani ómir salasyndaǵy erekshe eńbegi úshin Qazaqstan azamattary men sheteldikterge beriledi.
«Qoja Ahmet Yasaui» ordeni – aǵartý, mádeniet, gýmanitarlyq jáne áleýmettik salalardyń damýyna úles qosqan otandyq jáne sheteldik ǵalymdar, memleket jáne qoǵam qairatkerlerine tabystalady.
Sondai-aq memlekettik medaldar qataryna «Shámshi Qaldaiaqov» medali qosyldy. Ony kompozitorlar, dirijerler, án avtorlary, dástúrli jáne estradalyq mýzyka oryndaýshylary, sondai-aq mýzykalyq ónerdiń damýyna úles qosqan azamattar ala alady.
Qandai jańa qurmetti ataq beriledi?
Zańda «Qazaqstannyń eńbek sińirgen sýretshisi» degen qurmetti ataq qarastyrylǵan.
Bul ataq sýretshilerge, músinshilerge, keskindemeshilerge, grafikterge, zergerlerge, dizainerlerge, restavratorlar men sándik-qoldanbaly óner sheberlerine beriledi.
Sonymen qatar ǵylym, tehnika, ónerkásip, qurylys, geologiia, kólik, aýyl jáne sý sharýashylyǵy salalaryndaǵy qurmetti ataqtar tizimi de jańartylǵan.
Qandai marapat ielerine aqshalai tólem beriledi?
Zańda birqatar qurmetti ataq ielerine memlekettik tólem jasaý tártibi de kórsetilgen.
«Qazaqstannyń eńbek sińirgen ustazy» ataǵyn alǵan pedagogterge birjolǵy tólem beriledi. Onyń mólsheri «Pedagog mártebesi týraly» zańda belgilengen.
«Qazaqstannyń eńbek sińirgen dárigeri» ataǵyn alǵan meditsina qyzmetkerlerine de birjolǵy tólem qarastyrylǵan.
«Qazaqstannyń ǵaryshker-ushqyshy» ataǵynyń ielerine arnaýly memlekettik járdemaqy tólenedi.
Ártister men jazýshylarǵa qoiylatyn talaptar ózgerdi
«Qazaqstannyń halyq ártisi» ataǵyn teatr, tsirk, mýzyka jáne kino salasynda erekshe eńbek sińirgen óner qairatkerleri ala alady.
Alaida úmitkerler buǵan deiin «Qazaqstannyń eńbek sińirgen ártisi» nemese «Qazaqstannyń eńbek sińirgen qairatkeri» ataǵyn ielenýi kerek.
Al «Qazaqstannyń halyq jazýshysy» ataǵy otandyq ádebiettiń damýyna erekshe úles qosqan qalamgerlerge beriledi. Oǵan «Qazaqstannyń eńbek sińirgen qairatkeri» ataǵynyń ieleri men ádebiet salasyndaǵy memlekettik syilyqtyń laýreattary úmitker bola alady.
Eń joǵary memlekettik nagradalar naqtylandy
Zańǵa sáikes, «Altyn Qyran» ordeni Qazaqstan Respýblikasynyń eń joǵary dárejeli erekshelik belgisi bolyp sanalady.
Al «Halyq qaharmany» ataǵy el aldyndaǵy erekshe eńbegi men eldiń bostandyǵy men táýelsizdigi jolyndaǵy erligi úshin beriledi. Bul ataqqa ie bolǵandarǵa «Altyn Juldyz» ben «Otan» ordeni tabystalady.
Sondai-aq zańda Qazaqstannyń Tuńǵysh Prezidentine mártebesine sáikes «Halyq qaharmany» ataǵy tiisti nagradalarymen birge berilgeni týraly norma bekitilgen.
Qazaqstannyń Dańq kitabyna kimderdiń esimi engiziledi?
Joǵary memlekettik nagradalar men birqatar ordenderdiń iegerleri týraly málimetter Qazaqstan Respýblikasynyń Dańq kitabyna engiziledi.
Olardyń qatarynda «Otan», «Barys» I dárejeli, «Dańq» I dárejeli, «Al-Farabi» jáne «Qoja Ahmet Yasaui» ordenderiniń iegerleri, sondai-aq eń joǵary dárejeli erekshelik belgilerimen marapattalǵan azamattar bar.
Dańq kitabyn júrgizý, saqtaý tártibi men onyń sipattamasyn Úkimet bekitedi.
