Astanadaǵy Táýelsizdik saraiynda ótken saltanatty jiynda Memleket basshysy Qasym-Jomart Toqaev Kóshpendiler oiyndarynda jeńiske jetken qazaqstandyq sportshylar men bapkerlerdi quttyqtady, dep habarlaidy ult.kz.
Prezident ulttyq quramanyń jarysta 74 medal jeńip alyp, jalpy esepte birinshi orynǵa shyqqanyn atap ótti. Onyń ishinde 32 medal – altyn.
«Álemniń 100-den astam elinen kelgen sportshylarmen básekege túsip, kók bairaǵymyzdy biikke kóterý – naǵyz ult perzentterine tán asyl qasiet. Ulttyq komandamyz el úmitin tolyǵymen aqtady», – dedi Qasym-Jomart Toqaev.
Memleket basshysy sportshylardyń jetistigi eldiń mereiin ósirgenin aityp, olardyń jeńisterine búkil halyq jankúier bolǵanyn jetkizdi.
Prezident Kóshpendiler oiyndarynyń joǵary deńgeide ótkenine toqtalyp, jarys nátijeleriniń ádil bolǵanyn atap ótti. Osy rette Qyrǵyzstan Prezidentine alǵysyn bildirdi.
Kóshpendiler oiyndaryn birlese damytýǵa shaqyrdy
Qasym-Jomart Toqaev búkil álem túrki halyqtaryna nazar aýdaryp otyrǵanyn aityp, Kóshpendiler oiyndaryn birlese damytý mańyzdy ekenin jetkizdi.
«Qazaqstan osy ortaq iske belsene atsalysýǵa qashanda daiyn. Eki baýyrlas elge ata-babalarymyzdyń qaldyryp ketken eń qundy ósieti – ózara qurmet jáne máńgi dostyq», – dedi Prezident.
Onyń aitýynsha, Uly dala órkenietiniń murasyn, salt-dástúr men rýhani qundylyqtardy saqtaý jáne ony jas urpaqqa jetkizý – ortaq mindet.
Prezident Qazaqstannyń maqsaty biik, jospary aiqyn ekenin aityp, eldiń bolashaqqa senimmen qaraityn ozyq oily ult retinde alǵa umtylýy kerektigin atap ótti.
Sondai-aq Memleket basshysy sportshylardan bastap memlekettik qyzmetshilerge, kásipkerlerge, dárigerler men ustazdarǵa, stýdentter men ǵalymdarǵa deiin qoǵamnyń barlyq múshesin mádenietti ári sabyrly bolýǵa shaqyrdy.
«Bárimiz mádenietti, sabyrly bolyp, dańǵaza men aiqai-shýǵa jol bermeýimiz qajet. Sonda ǵana qazaq halqy tolyqqandy órkenietti qoǵam bolady», – dedi Qasym-Jomart Toqaev.
