Memleket basshysy Qasym-Jomart Toqaev Germaniiaǵa resmi saparynyń alǵashqy kúni eldiń jetekshi iskerlik qaýymdastyqtary men qarjy institýttarynyń basshylarymen kezdesti, dep habarlaidy ult.kz.
Kezdesýde Qazaqstan men Germaniia arasyndaǵy investitsiialyq jáne qarjylyq yntymaqtastyqty keńeitý, nemis kapitaly men tájiribesin Qazaqstannyń resýrstyq jáne kólik múmkindikterimen ushtastyrý máseleleri talqylandy.
Prezident Qazaqstan Germaniianyń Ortalyq Aziiadaǵy jáne Eýraziia keńistigindegi senimdi seriktesi bolýǵa umtylatynyn aitty.
Toqaevtyń sózinshe, Germaniia Qazaqstannyń Eýropadaǵy mańyzdy seriktesteriniń biri. Memleket basshysy eki el arasyndaǵy ekonomikalyq bailanystardyń áleýeti áli tolyq paidalanylmaǵanyn atap ótti.
Prezident sondai-aq Qazaqstannyń derbes kredittik reitingine qatysty sońǵy baǵalaýlarǵa toqtaldy. Onyń aitýynsha, S&P agenttigi Qazaqstan reitingin «turaqty» boljammen BBB deńgeiine kótergen. Fitch agenttigi de osyndai baǵa bergen.
Qazaq-german investitsiia-qarjy platformasy qurylýy múmkin
Qasym-Jomart Toqaev Qazaq-german investitsiia-qarjy platformasyn qurýdy usyndy.
Onyń aitýynsha, mundai platforma Germaniia men Eýropanyń kapitalyn Qazaqstan tarapynan qosa qarjylandyrý, kepildik berý jáne táýekelderdi birlesip basqarý tetikterimen ushtastyrýǵa múmkindik beredi.
Prezidenttiń aitýynsha, Qazaqstan damý banki nemis qarjy institýttarynyń qoldaýymen ónerkásip, energetika jáne kólik infraqurylymy salalarynda birqatar jobalardy júzege asyryp keledi.
Buǵan deiin Deutsche Bank, Helaba, LBBW, Commerzbank jáne KfW siiaqty uiymdardan osy baǵyttarǵa 1,2 milliard dollar qarjy tartylǵan.
Qazaqstan Germaniia kapitalyn jańa salalarǵa tartpaq
Kezdesýde asa mańyzdy shikizat, energetika jáne ónerkásip salalaryndaǵy yntymaqtastyq máselesi de kóterildi.
Qazaqstan Germaniianyń Shikizatpen qamtamasyz etý qorymen yntymaqtastyq ornatýǵa múddeli. Sonymen qatar jańartylatyn energiia kózderi men «jasyl» sýtegi jobalaryn damytý josparlanyp otyr.
Tsifrlyq tehnologiialar men jasandy intellekt te eki el arasyndaǵy yntymaqtastyqtyń basym baǵyttarynyń biri retinde ataldy.
Prezident germaniialyq kompaniialardy derekterdi óńdeý ortalyqtary, energiia tiimdiligi, bultty infraqurylym jáne kiberqaýipsizdik salalaryndaǵy jobalarǵa qatysýǵa shaqyrdy.
Sonymen qatar Qazaqstannyń tsifrlyq qarjy ekojúiesin Germaniianyń qarjy tehnologiialarymen ushtastyrý múmkindigi qarastyryldy.
Alatau City nemis kapitaly úshin jańa múmkindik bolýy múmkin
Qasym-Jomart Toqaev Qazaqstan ekonomikasyna nemis qarjy sektoryn tartatyn mańyzdy baǵyttardyń biri retinde Alatau City jobasyn atady.
Prezidenttiń aitýynsha, jańa qala tsifrlyq dáýirdiń talaptaryn eskere otyryp jobalanǵan jáne nemis kapitaly men Qazaqstannyń investitsiialyq múmkindikterin bailanystyratyn alańǵa ainala alady.
Memleket basshysy Qazaqstan investorlarǵa qolaily ári túsinikti jaǵdai qalyptastyrýdy, olardyń quqyqtaryn qorǵaýdy jáne strategiialyq mańyzdy jobalarǵa qoldaý kórsetýdi jalǵastyratynyn aitty.
