Memleket basshysy Qasym-Jomart Toqaev AQSh Prezidentiniń Ońtústik jáne Ortalyq Aziia boiynsha arnaiy ókili Serdjio Gormen kezdesti, dep habarlaidy ult.kz.
Kezdesý barysynda Prezident Qazaqstan men AQSh arasyndaǵy yntymaqtastyqtyń joǵary deńgeiin atap ótip, Vashingtonmen keńeitilgen strategiialyq seriktestikti odan ári nyǵaitýǵa múddeli ekenin málimdedi.
Qasym-Jomart Toqaev ásirese asa mańyzdy mineraldar boiynsha C5+1 dialogynyń mańyzdylyǵyna toqtalyp, bul baǵyttaǵy ózara yqpaldastyqtyń eki el arasyndaǵy strategiialyq áriptestikti kúsheite túsetinin aitty. Sonymen qatar ol AQSh Prezidenti Donald Trampqa izgi tilegin joldap, jyl sońyna qarai kezdesý ótkizýdi josparlap otyrǵanyn jetkizdi.
Óz kezeginde Serdjio Gor Donald Tramptyń sálemin jetkizip, Aq úidiń Qazaqstanmen qarym-qatynasty damytýǵa erekshe mán beretinin atap ótti. Onyń aitýynsha, sońǵy bir jyl ishinde AQSh pen Ortalyq Aziia elderi arasynda 20 milliard dollardan astam kelisim jasalǵan.
Taraptar saýda-ekonomikalyq jáne investitsiialyq jobalardy júzege asyrý máselelerin, sondai-aq asa mańyzdy mineraldar, kólik-logistika, tsifrlandyrý jáne ózge de basym baǵyttardaǵy yntymaqtastyqtyń keleshegin talqylady.
Kezdesý barysynda Qazaqstan teń quryltaishylarynyń biri sanalatyn Beibitshilik keńesi qyzmetine de erekshe nazar aýdaryldy. Memleket basshysy Qazaqstannyń halyqaralyq turaqtylyqty nyǵaitýǵa jáne gýmanitarlyq bastamalardy qoldaýǵa daiyn ekenin aitty.
Sondai-aq taraptar óńirlik jáne jahandyq kún tártibindegi ózekti máseleler boiynsha pikir almasty. Kezdesý qorytyndysynda Qazaqstan men AQSh ókilderi ekijaqty yntymaqtastyqty odan ári tereńdetýge ózara múddeli ekenin rastady.
