Tokiodaǵy jazǵy Olimpiadanyń uiymdastyrýshylary sáýirdiń aiaǵynda oiyndardy ótkizý erejeleriniń jańa nusqasyn bekitip, onda sportshylardyń kún saiyn koronavirýsqa testileýden ótýi kerektigi týraly tarmaq engizbek. Bul týraly Kyodo agenttigi habarlady.
Qazirgi kezde bul sheshim Halyqaralyq Olimpiada komitetimen (HOK) kelisilýde. Testterdiń basym bóligi antigenge tekseredi. Testileý oń nátije kórsetken jaǵdaida, dárigerler PTR tásili boiynsha qosymsha zertteý júrgizedi. Atletterden koronavirýs belgileri baiqalsa, olardy birden PTR testin tapsyrýǵa jiberedi. Osyǵan orai arnaiy olimpiadalyq aýylda bólek zerthana ashylmaq.
Tekseris kestesi oiyndardyń ýaqytyna bailanysty qurylady. Sonymen qosa oiynnyń qandai da bir kezeńi ótetin kúni sportshylar testileýden bosatylýy múmkin.
Kiodo dereginshe, «Tokio-2020» uiymdastyrý komiteti 9 mamyrda ótetin jeńil atletika boiynsha testilik jarystardy kórermendersiz ótkizýdi qarastyrýda.
Tokiodaǵy olimpiadalyq oiyndar 2020 jyldyń 24 shildesi men 9 tamyzy aralyǵyna josparlanǵan edi. Koronavirýs pandemiiasyna bailanysty olimpiada bir jylǵa shegerilip, endi 2021 jyldyń 23 shildesi men 8 tamyzy aralyǵynda ótpek.
