Memleket basshysy Qasym-Jomart Toqaevtyń Ábish Kekilbaiuly eskertkishiniń ashylý rásiminde sóilegen sózi.
***
Qurmetti áleýmet!
Ardaqty aǵaiyn!
Búgin biz zańǵar jazýshy, asa kórnekti memleket jáne qoǵam qairatkeri Ábish Kekilbaevtyń rýhyna taǵzym etýge jinaldyq.
Bul – tek Mańǵystaý jeri ǵana emes, búkil elimiz úshin mańyzdy oqiǵa.
Qazaq tarihynda óshpes iz qaldyrǵan kemeńger qalamgerdiń eskertkishi ashyldy.
Jańa ǵimaratqa qonystanǵan tarihi-ólketaný mýzeiine Ábekeńniń esimi berildi.
Taý tulǵaly talant, ǵulama oishyl Ábish aǵamyzdyń eren eńbegi qandai qurmetke de laiyq.
Mýzei qurylysyna, eskertkish ornatýǵa atsalysqan azamattarǵa alǵys aitamyn.
Bul Ábish Kekilbaevtyń seksen jyldyq mereitoiyna laiyqty tartý boldy.
«Adam óz topyraǵyna tartyp týady» degen qanatty sóz bar.
Mańǵystaý – qoinaýy qazynaǵa, tarihy taǵylymǵa toly kieli óńir.
Halyq jazýshysy, ultymyzdyń maqtanyshy Ábish Kekilbaiuly osyndai qasietti jerde dúniege keldi.
Shejireli ólke – qazaq taǵdyryna qatysty talai oqiǵalardyń kýási.
Mańǵystaýdyń «Jeti jurt jailap ótken jer» atanǵany barshaǵa málim.
Ertede osy óńirden Eýropa men Taiaý Shyǵysqa Uly Jibek joly jalǵasqanyn bilemiz.
Qazir bul ólke Kaspii teńizi arqyly elimizdi tórt memleketpen bailanystyryp tur.
Toǵyz joldyń torabyndaǵy oblys – qai jaǵynan alsaq ta, mańyzy zor aimaq.
Mádeni jádigerleri mol osy óńirdi ashyq aspan astyndaǵy murajai deýge bolady.
Bul – Pir Beket, Shaqpaq ata, Shopan ata siiaqty ǵulama babalarymyz ómir súrgen jer.
Mańǵystaý – barshaǵa belgili 362 áýlieniń mekeni.
Al, biz búgin rýhyn ulyqtap otyrǵan Ábish Kekilbai – adamzattyq bolmystyń joǵary deńgeiine kóterilgen birtýar tulǵa, qazaq halqynyń uly perzenti.
Halyqtyń maqtanyshyna ainalǵan azamattardyń esimin jadymyzdan shyǵarmaý – barshamyzdyń paryzymyz.
Elbasynyń «Shirkin-ai, osyndai qazaq kóbirek bolsa eken» dep Ábish aǵaǵa rizashylyq bildirýi tegin emes.
Ziialy qaýym oǵan airyqsha qurmet kórsetip, «Qazaqtyń tańdaiy» dep atady.
Ábish Kekilbaev – «Qazaqstannyń Eńbek Eri» ataǵyna ie bolǵan tuńǵysh qalamger.
Ábish aǵamyz ádebiet álemine kelgennen bastap ulttyq sanany saqtaý úshin mol eńbek etti.
Ana tilimizdi, salt-dástúrimizdi jáne tól mádenietimizdi dáriptep, halqyna adal qyzmet etti.
Ulttyq bolmys pen ulttyq rýh Ábish Kekilbai shyǵarmalarynyń dińgegine ainaldy.
«Ańyzdyń aqyry», «Eleń-alań», «Úrker», «Shyńyraý» – qaitalanbas týyndylar.
Klassik qalamgerdiń bul eńbekteri álem ádebietiniń altyn qoryna tiesili.
Jazýshy qara sózdiń qudireti arqyly eldiń namysyn oiatyp, rýhyn kóterdi.
Memleketimizdiń jetistikteri qalamgerdiń ult taǵdyry týraly maqalalarynda tolyq kórinis tapty.
Qoǵamnyń shynaiy sipatyn tanytqan Ábish Kekilbaevtyń kósemsózi halyqtyń rýhani azyǵyna ainaldy.
Tutas alǵanda, zańǵar jazýshynyń týyndylaryna tarih pen táýelsizdik arqaý boldy.
Ábekeńniń ár shyǵarmasy halqymyzdyń júreginen óshpes oryn aldy.
Onyń bilimi, kózqarasy, shyn máninde, sheksiz, biregei jáne ámbebap.
Ábish Kekilbai – qazaqtyń bolmys-bitimine álemdik keńistikten kóz salǵan kemel oidyń iesi.
Uly Abai «Óldi deýge bola ma, oilańdarshy, Ólmeituǵyn artyna sóz qaldyrǵan» deidi.
Ábish Kekilbaevtyń shyǵarmalary ǵasyrdan ǵasyrǵa ulasatyn rýhani qundylyq bolyp qalatyny sózsiz.
Qurmetti qaýym!
Ábish Kekilbaev – ǵulama jazýshy ǵana emes, asa kórnekti memleket jáne qoǵam qairatkeri.
Elbasynyń senimdi serigi retinde Táýelsiz Qazaqstannyń negizin qalaýǵa qosqan úlesi orasan zor.
Elimizdegi joǵary laýazymdarda qyzmet istep, halyqtyń yqylasyna bólendi.
Joǵarǵy Keńes tóraǵasy, Memlekettik hatshy, Senator qyzmetterin abyroimen atqardy.
Zańǵar jazýshyny Elbasymyz «Alashtyń álem aldyndaǵy betke ustar iri tulǵalarynyń biri» dep baǵalaǵan.
Ábish aǵamen Parlamentte áriptes retinde etene aralasyp, erekshe syilastym.
Ábish Kekilbaev Táýelsizdigimizdi qorǵaýǵa jáne nyǵaitýǵa atsalysqan asa kórnekti qoǵam qairatkeri bolǵanyna eshqandai kúmán joq.
Óitkeni, ol qazaqtyń oi-sanasyn jańǵyrtqan uly ózgeristerdiń basy-qasynda júrdi.
Kórnekti qairatker egemen elimizdiń tarihi shejiresinde óz qoltańbasyn qaldyrdy.
Onyń «Táýelsizdik – tátti sóz ǵana emes, ulttyq jaýapkershilik» degen tujyrymy barshaǵa oi salady.
Qazirgi jastarymyz Ábish Kekilbaevtyń qoǵamdyq-saiasi kózqarastaryn tanyp-bilýi kerek.
Biz ony el múddesin joǵary qoiǵan naǵyz patriot dep sanaimyz.
Ábish Kekilbaevtyń «Táýelsizdik bizdiń tilegimizdi emes, biz onyń tilegin tileýimiz qajet», – degen sózi búgingi býynnyń ustanymyna tolyq sai keledi.
Ábish Kekilbaev – sanaly ǵumyryn eline qaltqysyz qyzmet etýge arnaǵan ardaqty azamat.
Ol barsha jurtqa ultjandylyqtyń ozyq úlgisin kórsetti.
Jalpy, el damýynyń ár kezeńinde otansúigishtik qasietter ár qyrynan kórinedi.
Osy oraida, men qazirgi kezeńde Qazaqstan patriotizmi úsh tuǵyrǵa negizdelýi kerek dep sanaimyn.
Eń aldymen, patriotizm tól tarihymyz ben shyqqan tegimizdi tereń uǵynýdan bastalady.
Halqymyzdyń basynan ótken qily zamandy jáne el eńsesin kótergen jetistikterdi jas urpaqtyń bilgeni óte mańyzdy.
Túp-tamyrymyz myńjyldyqtarǵa ulasady. Muny maqtanysh sezimmen aitý – paryz.
Búgingi tańda bizdiń aldymyzda qazaq tarihyn jańasha baǵdarlap, qaitadan túzý mindeti tur.
Tarihymyzǵa qatysty kóptegen derekterdi jaryqqa shyǵarý qajet.
Mysaly, áigili Altyn Ordanyń 750 jyl buryn qazaq jerinde qurylǵany belgili.
Ulytaý óńiri men kóne Saraishyq – ult taǵdyryndaǵy uly oqiǵalardyń kýási.
Memlekettigimizge ózek bolǵan osyndai tarihi belesterdiń mán-mańyzyn jastar arasynda dáripteýge tiispiz.
Kelesi jyly uly Abaidyń 175 jyldyq, ál-Farabidiń 1150 jyldyq mereitoilaryn atap ótemiz.
Bul sharalar eldiń rýhyn kóteredi.
Azattyq úshin kúresken arystarymyzdyń esimin ulyqtaý arqyly azamattarymyzdyń, ásirese, jastardyń boiyna otanshyldyqty darytamyz.
Ekinshi. Patriotizm memleketimizdi jáne memlekettik institýttardy qurmetteýden bastalady.
Memleketimizdiń qazirgi qundylyqtaryn baǵalaý – barshamyzǵa ortaq mindet.
Bereke men birlik, turaqtylyq pen tynyshtyq, tatýlyq pen kelisim – bizdiń basty bailyǵymyz.
Kópshilik, ásirese, jastar memleket bolmasa, ult bolmaitynyn uǵynǵany jón.
Búgingi býyn túrli qaýesettIń jetegine ermei, el irgesiniń bútindigin saqtaýǵa atsalysýy kerek.
Patriotizm turaqtylyq ornyqqan elge jáne memleket institýttaryna degen qurmet sezimi arqyly nyǵaiady.
Óskeleń urpaq Ánurandy, Eltańbany jáne Kók týymyzdy qadirlei bilýi tiis.
Biz otansúigishtik qasietti damytqanda ǵana Táýelsizdikti nyǵaita alamyz.
«Qazaqstan patriotizmi» uǵymy bárimiz úshin ulttyq qundylyq bolýy kerek.
Úshinshi. Bizdiń maqsatymyz – eń damyǵan memleketterdiń qataryna qosylyp, álemdegi laiyqty ornymyzdy alý.
Otansúigishtik – jai ǵana uran tastaý emes.
Qazirgi tańda bul bilim alý, ǵylymǵa umtylý, innovatsiia men tehnologiiany igerý arqyly júzege asady.
Búgingi zaman – bilektiniń emes, bilimdiniń, iaǵni, aqyl-oi básekesiniń zamany.
Bul – ásirese, jastarǵa qatysty mańyzdy mindet.
Óitkeni jas býyn – patriottyq rýhtyń negizgi qozǵaýshy kúshi.
Óskeleń urpaq ózge eldiń ozyq tájiribesin úirense, álemdik básekege qabiletin arttyrady.
Bizdiń jastarymyz Qazaq elin búkil dúnie júzine tanytatyn jobalar men bastamalardy júzege asyrýǵa talpynýy kerek.
Sonda ǵana otanshyl, ultjandy urpaqty jańa geosaiasat, geoekonomika jaǵdaiyna beiimdeimiz.
Qazaqstan patriotizmi osyndai úsh tuǵyrǵa negizdelse, táýelsizdigimizdi nyǵaityp, elimizdiń jarqyn bolashaǵyna jol ashamyz.
Bul – HHI ǵasyrda ult retinde saqtalýymyzdyń, jańa synaqtardan súrinbei ótýimizdiń kepili.
Qurmetti aǵaiyn!
Búgingi kúni ziialy qaýymnyń mańyzdy mindeti óskeleń urpaqty patriottyq rýhta tárbieleý dep sanaimyn.
Ábish Kekilbai – otanshyldyqtyń jarqyn simvoly.
Osy sharaǵa Ábish aǵamyzdyń áriptesteri, qalamger dostary, izbasarlary arnaiy kelip otyr.
Qazaq ziialylarynyń salmaqty sózi – tárbieniń tiimdi quraly.
«Urpaǵyna ie bola almaǵan jurt ulttyqtan aiyrylady» degen Ábish Kekilbaidyń sózi árdaiym esimizde turady.
Jazýshynyń mol murasy, ónegeli taǵylymy osy maqsatqa qyzmet ete beredi dep oilaimyn.
Sózimniń sońynda aitarym, qasterli Mańǵystaý jeri qut-berekege tolsyn!
Ábish Kekilbaevtyń murasy el igiligine ainala bersin!
Tórimizde otyrǵan qadirli Klara apaiǵa, Ábish Kekilbaevtyń urpaqtaryna amandyq tileimin!
Uly dalamyz árqashanda aman bolsyn!
