Foto: Altainews.kz
Memleket basshysynyń tapsyrmasyna sáikes, elimizde basqarýshylardyń jańa býynyn qalyptastyrýǵa baǵyttalǵan «Bilim berýdegi 1000 kóshbasshy» strategiialyq jobasy júzege asyrylýda, dep habarlaidy Ult.kz.
Joba halyqaralyq ozyq tájiribege negizdelgen: kóptegen elderde mektep direktorlaryn taǵaiyndamas buryn olardy arnaiy daiarlaý mindetti talap sanalady. Qatysýshylar oqýdan ótip, úzdik bilim berý uiymdarynda taǵylymdamadan ótedi jáne tálimgerlik qoldaýmen qamtylady. Bul basqarýshylyq qabiletterdi júieli túrde damytýǵa jáne senimdi sheshim qabyldai alatyn jetekshilerdi qalyptastyrýǵa múmkindik beredi.
Búgingi tańda respýblikalyq kadrlyq rezervke 583 pedagog engizilip, olardyń 397-si konkýrstan tys negizde basshylyq qyzmetke taǵaiyndaldy. Tek 2024 jyldyń ózinde 36 rezervist jańa úlgidegi «Keleshek mektepteri» jobasy aiasynda salynǵan mektepterdiń direktorlary boldy.
Jobaǵa qatysýshynyń biri – №290 jaily mekteptiń direktory Móldir Smahanova. Ol barlyq kezeńnen ótip, baǵdarlamaǵa sai jan-jaqty daiyndyqtan ótti. Basshylyqqa taǵaiyndalmas buryn zamanaýi basqarý tásilderin meńgerip, kásibi daǵdylaryn jetildirdi.
«Bul joba meniń direktor qyzmetine degen kózqarasymdy múlde ózgertti. Qazirgi zamanǵy mektepke tek basqarýshy emes, ujymdy yntalandyryp, muǵalimderdiń kásibi damýyna jáne oqýshylardyń qabiletin tolyq ashýǵa múmkindik beretin kóshbasshy qajet. «Keleshek mektepteri» modeli osyndai jańa basqarý mádenietin qalyptastyrady», – dedi joba túlegi.
Prezidenttik jastar kadrlyq rezervi tájiribesine negizdelgen bul joba 2023 jyldan bastap Qazaqstan Respýblikasy Oqý-aǵartý ministrliginiń bastamasymen júzege asyrylyp keledi. Qatysýshylardy irikteý protsesi bes kezeńnen turady: testileý, oqytý, taǵylymdama, qorytyndy baǵalaý jáne suhbat. 2024 jyly 2,5 myńnan astam úmitkerdiń arasynan kásibi daiarlyq kýrsyna 433 kandidat iriktelip alyndy.
Aita keteiik, buǵan deiin «Órleý» kýrstary arqyly 4 myńǵa jýyq direktor qaita daiarlyqtan ótkenin jazǵanbyz.
