Qasym-Jomart Toqaev TMD Úkimetteri basshylary keńesiniń múshelerimen kezdesti, - dep habarlaidy "Ult aqparat" Aqordaǵa silteme jasap.
Kezdesýge Qazaqstan Respýblikasynyń Premer-ministri Álihan Smaiylov, Ázerbaijan Respýblikasynyń premer-ministri Áli Asadov, Belarýs Respýblikasynyń premer-ministri Roman Golovchenko, Tájikstan Respýblikasynyń premer-ministri Kohir Rasýlzoda, Ózbekstan Respýblikasynyń premer-ministri Abdýla Aripov, Resei Úkimetiniń tóraǵasy Mihail Mishýstin, Qyrǵyz Respýblikasy Ministrler kabinetiniń tóraǵasy - Prezident Ákimshiliginiń basshysy Aqylbek Japarov, Armeniia Respýblikasynyń vitse-premeri Mger Grigorian, Túrikmenstan Ministrler kabineti tóraǵasynyń orynbasary Hodjamurat Geldimýradov jáne TMD Atqarýshy komitetiniń tóraǵasy - atqarýshy hatshysy Sergei Lebedev qatysty.
Prezident TMD elderi delegatsiialarynyń basshylaryna iltipat bildire otyryp, ekonomikalyq seriktestikti keńeitý úshin jaǵdai jasaýdyń mańyzdylyǵyn atap ótti.
"Jýyrda TMD-ǵa múshe elderdiń basshylarynyń Sammiti ótti. Biz ózara yntymaqtastyqty arttyrýǵa, ekonomikanyń áleýetin nyǵaitýǵa degen ortaq nietimizdi bildirdik", - dedi Memleket basshysy.
Qasym-Jomart Toqaev shielenise túsken geosaiasi qaishylyqtarǵa, álemdik ekonomikadaǵy turaqsyzdyqqa nazar aýdara otyryp, birqatar tiimdi shara qabyldaýǵa shaqyrdy.
"Bul rette ózara saýda-ekonomikalyq yntymaqtastyq mańyzdy ról atqarady. Ózderińizge málim, Qazaqstannyń biylǵy tóraǵalyǵy aiasynda TMD-nyń 2030 jylǵa deiingi ekonomikalyq damý strategiiasynyń mindetterin belsendi júzege asyrý isi jalǵasty. Halyqaralyq naryqtaǵy daǵdarys jaǵdaiyna qaramastan, ekonomikamyz birtindep qalpyna kele bastady", - dedi Prezident.
Memleket basshysy kedergilerdi joiýǵa, protektsionizmge jol bermeýge, qolaily tariftik sharttar qalyptastyrýǵa, ákimshilik rásimderdi jeńildetýge shaqyrdy.
Qasym-Jomart Toqaev óz sózinde kólik-tranzit áleýetin damytý máselelerine de toqtaldy. Atap aitqanda, Eýraziia naryqtaryna jańa múmkindikter ashatyn Transkaspii halyqaralyq kólik baǵytynyń keleshegi bar ekenin jetkizdi.
"Bul máseleniń ózektiligi artyp keledi. TMD-ǵa múshe memleketter qolda bar áleýetti damytý úshin birlesip jumys isteitin bolady. Atap aitqanda, Iranǵa, Parsy shyǵanaǵy men Úndistanǵa shyǵatyn "Soltústik - Ońtústik" baǵyty boiynsha saýda-sattyqty órkendetý mańyzdy", - dedi Prezident.
Qasym-Jomart Toqaev sóziniń sońynda Astanada ótip jatqan TMD úkimetteri basshylary keńesiniń otyrysy Dostastyqqa múshe elderdiń aldynda turǵan mindetterdi sheshýge óz úlesin qosatynyna senim bildirdi.
