Prezident Qasym-Jomart Toqaevtyń tóraǵalyǵymen «Aqorda» rezidentsiiasynda Reformalar jónindegi joǵary keńestiń birinshi otyrysy ótti, dep habarlaidy "Ult aqparat".
Jiynda Reformalar jónindegi joǵary keńestiń músheleri: QR Prezidentiniń keńesshisi – Reformalar jónindegi joǵary keńes Tóraǵasynyń orynbasary Ser Sýma Chakrabarti, Premer-Ministr Asqar Mamin, Strategiialyq josparlaý jáne reformalar jónindegi agenttiktiń tóraǵasy Qairat Kelimbetov, sondai-aq, sheteldik bedeldi sarapshylar – Andres Velasko, lord Frensis Mod jáne lord Fillip Hammond baiandama jasady.
Memleket basshysy sóilegen sózinde el azamattarynyń tyń tásilder men tiimdi sheshimder kútetinin, mundai sátte Reformalar jónindegi joǵary keńestiń mańyzdy ról atqaratynyn atap ótti. Prezidenttiń aitýynsha, Keńes ulttyq ekonomikanyń básekege qabilettiligin nyǵaitýǵa jáne turǵyndardyń ál-aýqatyn arttyrýǵa bailanysty asa kúrdeli máseleler boiynsha sheshimder qabyldaityn bolady.
Prezident óz sózinde Keńes qyzmeti basqa konsýltativtik-keńestik organdardan túbegeili erekshelenýi tiis ekenin, qoǵamdaǵy ózekti máselelerdi nemese túiindi túitkilderdi jasyrmai ashyq aitý qajet ekenin atap ótti.
– Derekterdi tizip, qalyptasqan jaǵdaidy sipattaýmen shektelýge bolmaidy. Bastysy – ýaqytyly sheshim qabyldaý. Keńes is júzinde júzege aspaityn, aldyn ala ázirlengen usynystardy quptap qana otyrmaýy tiis. Keńes mekemearalyq uzaq daýlarǵa núkte qoiýy kerek. Ulttyq ekonomikany basqarýda, qoǵamdyq damýda, institýtsionaldyq reformalar júrgizýde jańa baǵyttar usynýǵa mindetti. Árine, qazirgi jumystardy da baqylaýy tiis, – dedi Qasym-Jomart Toqaev.
Prezident Keńestiń kelesi otyrysynda memlekettik josparlaý júiesindegi jańa tásilderdi qarastyrýdy jáne osy másele boiynsha sheshim qabyldaýdy usyndy.
– Biz árbir salada memlekettiń maqsattary men damý kezeńderin aiqyndaityn baǵdarlamalyq qujattardyń ikemdi arhitektýrasyn qurýymyz kerek. Júie biýdjetti josparlaýmen bailanystyrylady jáne memlekettik organdar basshylarynyń júktelgen mindettiń oryndalýyna tikelei jaýapty ekenin bekitedi. Joǵary keńestiń sheshimderiniń oryndalýyn, ulttyq jobalardyń júzege asyrylýyn, reformalardy jobalyq basqarý qaǵidattarynyń engizilýin qamtamasyz etý mańyzdy. Qazirgi kezeńde bul – Strategiialyq josparlaý jáne reformalar jónindegi agenttiktiń negizgi mindeti, – dedi Qazaqstan Prezidenti.
Sonymen qatar Qasym-Jomart Toqaev orta merzimdi perspektivadaǵy is-qimyldarǵa negiz bolýǵa tiisti El damýynyń 2025 jylǵa deiingi strategiialyq josparyna nazar aýdardy. Atalǵan qujatta damýdyń jańa kún tártibi jasalady.
Memleket basshysy Úkimettiń Strategiialyq jospardyń alǵashqy nusqasyn ázirlegenin, endi ony Strategiialyq josparlaý jáne reformalar jónindegi agenttikpen birlesip, sońyna deiin jetkizý jáne Joǵary keńes múshelerimen talqylaý, sondai-aq, sońǵy nusqasyn kelesi jiynda Premer-Ministrge usyný qajettigin atap ótti.
Qasym-Jomart Toqaev beriletin bastapqy málimetterdiń sapasynda, ásirese, vedomstvolyq statistikada túitkildi máseleler baryn aitty. Statistika komitetin Strategiialyq josparlaý jáne reformalar jónindegi agenttikke berý bul problemany sheshýge septigin tigizýi tiis.
– Faktologiialyq málimetterdiń shynaiylyǵyn jáne olardyń sapaly túsindirilýin qamtamasyz etýge baǵyttalǵan reformalardy ázirleý kerek. Ekonomikalyq, demografiialyq jáne basqa da úderisterdi durys modeldeý, ázirlengen sheshimderdi qabyldaý úshin durys boljam jasaý maqsatynda úlken derekterdi óńdeýdiń tetikterin paidalaný qajet, – dedi Prezident.
Memleket basshysy Strategiialyq josparlaý jáne reformalar jónindegi agenttikke Tsifrlyq damý, innovatsiialar jáne aeroǵarysh ónerkásibi ministrligimen birlesip, atalǵan máseleni muqiiat pysyqtaýǵa jáne ahýaldy jaqsartý úshin naqty usynystar engizýge tapsyrma berdi.
Kezdesýde Qazaqstan Prezidenti «halyq únine qulaq asatyn memleket» tujyrymdamasy jaiynda da aitty. Ol jumys barysynda úkimettik emes uiymdar men jekelegen azamattardyń beitarap pikirlerin eskerý qajettigin atap ótti.
Memleket basshysy Keńes sheńberinde reformalaýdyń árbir mańyzdy baǵyty boiynsha alty jumys tobyn qurýdy usyndy. Jumys toptarynyń quramyna Keńes múshelerinen bólek, laýazymdy tulǵalar, qoǵamdyq uiymdardyń ókilderi, halyqaralyq jáne otandyq táýelsiz sarapshylardyń kirý múmkindigi bar.
Qasym-Jomart Toqaev birinshi top retinde Sýma Chakrabartidiń basshylyǵymen tiimdi makroekonomikalyq saiasat tobyn qurýdy usyndy. Bul top aqsha-nesie jáne biýdjet saiasatynyń tiimdiligi, salyq júiesi, qarjy sektorynyń turaqtylyǵyn qamtamasyz etý siiaqty mindetterdi iske asyrýdy kózdeýi kerek.
Ekinshi top, Prezident Ákimshiliginiń Basshysy Erlan Qoshanovtyń jetekshiligimen sot jáne quqyq qorǵaý júiesin reformalaýmen ainalysýy qajet. Prezident atalǵan baǵytta aýqymdy jumys atqarý kerek dep sanaidy. Sondyqtan kózboiaýshylyqqa jol berilmeýi tiis.
Memleket basshysy áleýmettik salany qaita jańǵyrtýǵa arnaiy top jumyldyrylatynyn aitty. Ol óziniń tikelei tapsyrmasymen Qazaqstan úshin múlde jańa qujat, atap aitqanda, Áleýmettik kodekstiń ázirlenip jatqanyna toqtaldy.
– Shyn máninde, bul qujat jekelegen adam men memleket arasyndaǵy qarym-qatynasty júieleýge, olardyń ózara mindettemelerin aiqyndaýǵa, sondai-aq, qazaqstandyqtarǵa beriletin tómengi áleýmettik kepildikterdi naqtylaýǵa arnalǵan. Iaǵni, qujatta azamattardyń balabaqshaǵa barǵannan zeinetke shyqqanǵa deiingi ómiri tolyq qamtylǵan, – dedi Qasym-Jomart Toqaev.
Sonymen qatar ekonomikany ártaraptandyrý boiynsha da top qurylady. Memleket basshysy elimiz úshin budan basqa jol joq ekenine senimdi. Degenmen, onyń pikirinshe, naqty jumys isteitin tetikter áli de jetkiliksiz.
– Ázirge shikizat óndirý, alyp-satýmen ainalysý jáne memlekettik tapsyrysqa «iek artyp otyrý» áldeqaida tiimdi, – dedi Memleket basshysy.
Joǵaryda atalǵan eki toptyń jumysy Premer-Ministrdiń basshylyǵymen uiymdastyrylady.
Besinshi toptaǵy Úkimet pen «Atameken» Ulttyq kásipkerler palatasynyń ókilderi biznesti retteý máselelerimen ainalysady.
Prezident Ákimshiligi Basshysynyń orynbasary Timýr Súleimenov basqaratyn altynshy top zamanaýi memlekettik basqarý jáne tiimdi memlekettik qyzmet máselelerin baqylaýǵa alatyn bolady.
– Bizdiń aldymyzda memlekettik apparatty jańa sapaly deńgeige kóterý máselesi tur. Ol naqty nátijelerge qol jetkizý úshin ózine jaýapkershilik alatyn, qandai da bir sheshim qabyldaǵanda meilinshe ikemdi ári quzyretti bolýy kerek. Bul jerde kóp nárse zamanaýi tsifrlyq tehnologiialardy engizýge bailanysty. Atalǵan máselede eshqandai kedergi bolmaýy tiis, – dedi Memleket basshysy.
Sóz sońynda Qazaqstan Prezidenti uzaq oilanýǵa ýaqyt joq ekenin, jumys toptarynyń aldynda memlekettik mańyzdy mindetter turǵanyn atap ótti.
– Kelesi jyly el Táýelsizdiginiń 30 jyldyǵyn atap ótemiz. Bul aitýly datany merekelik is-sharalarmen emes, naqty istermen qarsy alýymyz kerek. Táýelsizdigimizdiń 30-jylyna qýatty, ónimdi eńbekpen jetken abzal. Bul jerde, eń aldymen, azamattarymyzdyń ál-aýqatyn arttyrýǵa baǵyttalǵan tiimdi reformalar jóninde sóz bolyp otyr, – dedi Memleket basshysy.
