Foto: Aqorda
Memleket basshysy Respýblikalyq shtabtyń otyrysyn ótkizdi, - dep habarlaidy "Ult aqparat" Aqordaǵa silteme jasap.
Prezident Qasym-Jomart Toqaevtyń tóraǵalyǵymen Sý tasqynyna qarsy sharalardy úilestirý jáne qarǵyn sý júrý kezeńiniń saldaryn joiý jónindegi respýblikalyq shtabtyń otyrysy ótti.
"Biylǵy qarǵyn sý aýqymy jaǵynan sońǵy 30 jyldaǵy eń iri sý tasqyny sanalǵan 2012 jáne 2017 jyldardaǵy deńgeiden asyp ketti. Bul neni bildiredi? Boljam jumystary múldem bolmaǵan. Jaǵdai salalyq mamandardyń tapshylyǵynan týyndap otyr. Eger ákimdikter jyl saiyn sý tasqynyna qarsy josparlanǵan barlyq is-sharany tiisti deńgeide júzege asyrǵanda, aýa-raiy jaǵdaiyn eskergenniń ózinde, apattyń saldary men aýqymy munshalyqty bolmas edi. Soǵan qaraǵanda, ákimdikter bul jumystarmen ainalyspaǵan. Qazir sý tasqynynan tónetin qaýip seiildi deýge kelmeidi. Sondyqtan Ishki ister ministrliginiń, Ulttyq ulannyń, Qarýly Kúshterdiń, Ulttyq qaýipsizdik komitetiniń barlyq kúshi men quralyn, onyń ishinde kadrlyq jáne tehnikalyq resýrsyn barynsha jumyldyrý qajet. Sonymen qatar eriktilerdi, járdem bergisi keletin azamattardy tartý kerek. Alaida, eń bastysy – memlekettik organdar. Ahýal kez kelgen sátte ýshyǵyp ketýi múmkin. Qazirgi basty mindet – adam shyǵynyna jol bermeý. Bul oraida jiberilgen qatelikter men olqylyqtardy eskerýimiz qajet", – dedi Prezident.
Qasym-Jomart Toqaev Úkimetke, quzyrly memlekettik organdarǵa jáne oblystardyń ákimderine birqatar tapsyrma berdi.
"Sý tasqynynan zardap shekken adamdarǵa tiisti barlyq kómek kórsetilsin. Bul maqsatqa Úkimettiń jáne ákimdikterdiń rezervin ǵana emes, "Qazaqstan halqyna" qorynyń qarjysyn da paidalaný qajet. Osyndai jaýapty sátte elimizdegi biznes ókilderin halyqqa qol ushyn sozýǵa shaqyramyn. Apattan zardap shekken azamattarǵa jáne aimaqtarǵa barynsha qoldaý kórsetý kerek. Bul – dál qazirgi kezeńde barshaǵa ortaq mindet. Qarǵyn sýdan qatty shyǵynǵa ushyraǵan batys aimaqtarda iri kásiporyndar kóp. "Samuryq-Qazyna" qoryna qarasty kompaniialar, jer qoinaýyn igerýshiler bar. Olar halyqqa járdem berip, búlingen infraqurylymdy qalpyna keltirýge atsalysady dep senemin", – dedi Memleket basshysy.
Prezident sý basqan aimaqtarda áleýmettik mańyzy bar qyzmetter men azyq-túlik baǵasynyń ósýine jol bermeý máselesine Úkimet nazaryn aýdardy.
"Sý tasqyny men órtke qatysty jaǵdai jyl saiyn qaitalanady. Jaýapty organdar men salalyq qyzmetterdiń (Qazsýshar, Qazgidromet) jobalaý, saraptama jasaý jumystary nashar uiymdastyrylǵan. Tiisti sharalar, negizinen, jaǵdai oryn alǵannan keiin nemese tolyqqandy boljam jasalmai qabyldanady. Sondyqtan bizge daǵdarys jaǵdailaryn boljaýdyń naqty tetigi óte qajet. Tsifrlyq damý ministrligi Ekologiia, Sý resýrstary jáne Tótenshe jaǵdailar ministrlikterimen birlesip jyl sońyna deiin barlyq yqtimal tótenshe jaǵdailardy (sý tasqyny, órt jáne t.b.) modeldeýge, tiisti boljamdar, usynymdar men is-qimyl josparyn jasaýǵa múmkindik beretin aqparattyq júie ázirleýge tiis. Aitpaqshy, Úkimet pen jergilikti atqarýshy organdar, eń aldymen, oblystardyń ákimderi jazǵy maýsymǵa da daiyn bolýy qajet. Órt nemese basqa da tabiǵi apattardyń bolýy ábden múmkin. Qazirgidei qamsyz otyrmai, aldyn ala áreket etý kerek. Sý tasqynyn kórgende, kókten túskendei abdyrap qaldyńyzdar. Osy rette elimizdiń shyǵys óńirlerindegi sý tasqynyn modeldeý jónindegi TJM men "Qazaqstan Ǵarysh Sapary" ulttyq kompaniiasynyń birlesken jumys tájiribesin qoldanýǵa bolady", – dedi Qasym-Jomart Toqaev.
Prezident qarǵyn sýdy aýyl sharýashylyǵy qajetine jaratý úshin jospar ázirleý jáne pármendi sharalar qabyldaýdy tapsyrdy. Onyń aitýynsha, ákimdikter erigen qar sýyn eldi mekenderden ózen arnalaryna nemese toǵandarǵa burý jumystaryn júrgizýi kerek.
Memleket basshysy Úkimet bekitken Sý resýrstaryn basqarý júiesin damytýdyń 2030 jylǵa deiingi tujyrymdamasyn synǵa aldy. Onyń pikirinshe, tujyrymdamany júzege asyrý jónindegi is-qimyl jospary deklarativtik sipatqa ie. Qujat sý tasqyny saldarynan bolatyn shyǵynnyń aldyn alý jáne azaitý máselesin keshendi túrde sheshýge múmkindik bermeidi. Sondyqtan tujyrymdamany qaita qaraý jóninde mindet júkteldi.
"Quzyrly mekemeler, iaǵni ákimdikter, Tótenshe jaǵdailar ministrligi, Sý resýrstary ministrligi birlesip jumys jasamaidy. Jaýapkershilik alýdan qashady. Jumysty bir-birine siltep otyrady. Jaǵdai osylai jalǵasatyn bolsa, tiisti qyzmetkerlerdi laýazymynan bosatý qajet. Eń basty kriterii – memlekettik qyzmetshilerdiń tiimdiligi. Memlekettik organdar jáne ákimdikter arasynda naqty ári turaqty bailanys algoritmi joq. Tiisti ministrlik elimizdiń tabiǵi apattarǵa daiyndyǵyn qadaǵalap otyrýy qajet. Bul – ministrliktiń negizgi maqsaty. Osy máselege basa nazar aýdarý kerek. Ministrlik gidrotehnikalyq jáne basqa da mańyzdy nysandardyń jaǵdaiyn tekserip, shynaiy málimet berip otyrýǵa tiis", – dedi Prezident.
Memleket basshysy sý tasqyny máselesi boiynsha halyqaralyq tájiribeni, ózge elderdiń qarǵyn sýdy qalai igeretinin muqiiat zertteý qajet ekenin aitty.
Jiyn barysynda Qasym-Jomart Toqaev elimizde sý resýrstary, irrigatsiia salalary boiynsha tehnikalyq mamandardyń tapshylyǵyna nazar aýdardy. Osyǵan qatysty Úkimetke shuǵyl túrde sheshim qabyldaýdy tapsyrdy.
"Taǵy da qaitalap aitamyn. Tasqynnyń aldyn alý isine árbir laýazym iesi tikelei jaýap berýge tiis. Sizderdiń jumystaryńyzdy nemquraily jáne kásibi mindetke sai kelmeidi dep baǵaladym. Sonyń saldarynan azamattarymyz úlken materialdyq shyǵynǵa ushyrady. Olar densaýlyǵy men ál-aýqatyna ziian keltiretin turmystyq qolaisyzdyqtarǵa tap boldy. Árine, memleket shyǵyndy óteý úshin sharalar qabyldaidy. Azamattarǵa aitarym, alańdamańyzdar. Memleket, sondai-aq kásipkerler barlyq shyǵyndy ótep beredi. Biraq qarjylyq jáne saiasi shyǵyndar orasan zor. Ony da eskerý kerek. Sondyqtan Úkimetke júkteler jumys kóp. Qysqasy, talap qatań bolady", – dedi Prezident.
Otyrys barysynda premer-ministr Oljas Bektenov, Tótenshe jaǵdailar ministri Shyńǵys Árinov, Aqtóbe oblysynyń ákimi Ashat Shaharov, Batys Qazaqstan oblysynyń ákimi Nariman Tóreǵaliev, Qostanai oblysynyń ákimi Qumar Aqsaqalov, Shyǵys Qazaqstan oblysynyń ákimi Ermek Kósherbaev, Qaraǵandy oblysynyń ákimi Ermaǵanbet Bólekpaev, Aqmola oblysynyń ákimi Marat Ahmetjanov, Soltústik Qazaqstan oblysynyń ákimi Ǵaýez Nurmuhanbetov, Ulytaý oblysynyń ákimi Berik Ábdiǵaliuly jáne Abai oblysynyń ákimi Nurlan Uranhaev baiandama jasady.
